له‌ دیداریدا له‌گه‌ڵ سه‌رۆكی هه‌رێمی كوردستان، سەرۆكوەزیرانی پێشووی فەڕەنسا وێڕای ئەوەی پیرۆزبایی سەركەوتنەكانی پێشمەرگەی كرد، به‌ (سه‌رۆك بارزانی)ی رایگه‌یاند، كە بۆ دووپاتكردنەوەی پاڵپشتی و پشتیوانیی خۆیان لە گەلی كوردستان و پێشمەرگە هاتوونە كە لەجیاتی هەموو جیهان شەڕی تیرۆر دەكەن و، ئەوەیشی باس كرد كە دەیانەوێ هەوڵەكانیان بخەنەگەڕ بۆ یارمەتیدانی زیاتری گەلی كوردستان.

ئه‌مڕۆ شەممە 4ـی 6ـی 2016، لە سەلاحەدین، (مەسعوود بارزانی) سەرۆكی هەرێمی كوردستان، پێشوازی لە (فەڕەنسیس فیلۆن) سەرۆكوەزیرانی پێشوو و ئەندامی پارلەمانی ئێستای فەڕەنسا و شاندێكی یاوەری كرد كە پێكهاتبوو لە چەند سێناتۆر و پارلەمانتاری پارتی كۆماریی فەڕەنسا و كۆنسووڵی ئەو وڵاتە لە شاری هەولێر.

لە دیدارەكەدا سەرۆكوەزیرانی پێشووی فەڕەنسا ستاییشی ڕۆڵی (سەرۆك بارزانی) و هێزی پێشمەرگەی كوردستانی كرد لە ڕووبەڕووبوونەوەی تیرۆریستان و پاراستنی پێكهاتە نەتەوەیی و ئایینییەكان؛ پێزانینیشی بۆ خەڵكی كوردستان هەبوو كە بوونەتە پەناگای خەڵكی ئاوارە و لێقەوماو.
هەروەها وێڕای ئەوەی پیرۆزبایی سەركەوتنەكانی پێشمەرگەی كرد، ئەوەیشی خستەڕوو كە بۆ دووپاتكردنەوەی پاڵپشتی و پشتیوانیی خۆیان لە گەلی كوردستان و پێشمەرگە هاتوونە كە لەجیاتی هەموو جیهان شەڕی تیرۆر دەكەن و، ئەوەیشی باس كرد كە دەیانەوێ هەوڵەكانیان بخەنەگەڕ بۆ یارمەتیدانی زیاتری گەلی كوردستان.

لەبەرانبەردا (سەرۆك بارزانی) سوپاسی گەل و سەرۆك و حكوومەتی فەڕەنسای كرد كە لە كاتی تەنگانەدا پشتیوان و یارمەتیدەری گەلی كوردستان بوونە و، لە وتەیەكدا باسی لە هەڕەشەی تیرۆر و توندڕۆیی و سەرەتاكانی هاتنی داعش كرد و ئاماژەی بەوەدا كە داعش تەنیا هەڕەشە نییە بۆ سەر پێكهاتەیەكی دیاریكراو، بەڵكو هەڕەشەیە بۆ سەر مرۆڤایەتی و ژیان و ڕووبەڕووبوونەوەیشی هەوڵێكی جیددی و هەمەلایەنەی كۆمەڵگای نێودەوڵەتی پێویستە لە بوارەكانی سەربازی و سیاسی و ئایدیۆلۆژی و كۆمەڵایەتیدا.
لەبارەی مەسیحییەكانی كوردستانیش، (سەرۆك بارزانی) ئەوەی خستە ڕوو كە چارەنووسی هەموومان لەم وڵاتە پێكەوە بەستراوە. بە خوشك و برا مەسیحییەكانم ڕاگەیاندووە كە بیر لە جێهێشتنی وڵات نەكەنەوە یان هەموومان بەیەكەوە دەمرین یان بەیەكەوە بە ئازادی و سەربەستی دەژییێن. ئەوەیشی دووپات كردەوە كە لەنێو خەڵكی كوردستان هیچ جۆرە حەساسییەتێكی ئایینی و مەزهەبی و نەتەوەیی بوونی نییە و پێكەوەژیان شێوەی فەرهەنگێكی مێژوویی وەرگرتووە.

(سەرۆك بارزانی) ئەوەیشی بۆ شاندی میوان باس كرد، كە دەبێ بیر لە قۆناغی دوای داعش بكرێتەوە و ڕێككەوتنێكی وا بكرێت كە ژیانی پێكهاتەكان و ئاسوودەییان گەرەنتی بكرێت، كە چیتر تووشی كارەسات نەبنەوە.







KDP

(سەرۆك بارزانی) داوایشی لە شاندی میوان كرد كە بەردەوام بن لە پاڵپشتیكردنی پێشمەرگە و پشتیوانیكردنی مافەكانی گەلی كوردستان لە دیاریكردنی چارەنووسی خۆی.

هەر لەم كۆبوونەوەیەدا بارودۆخی سیاسی و ئەمنیی ناوچەكە و پەیوەندییەكانی نێوان هەرێم و بەغدا خرایە بەر باس و گفتوگۆ.