ئەمریكا سەركەوتنی پێشمەرگەی لە باشووری موسڵ راگەیاند
پاتریک رایدەر، گوتەبێژی فەرماندەیی هێزەکانی ناوەندی ئەمریکا رۆژی هەینی 3-6-2016، باسی سەركەوتنەكانی پێشمەرگە و شكستی چەكدارانی داعشی كرد و رایگەیاند، هێزەکانی پێشمەرگە بە پاڵپشتی هاوپەیمانان 85 کیلۆمەتریان لە باشووری موسڵ کۆنترۆڵکردووەتەوە.
پاتریک رایدەر لە تۆڕی كۆمەڵایەتی توویتەر روونكردنەوەی زۆرتری داوە و ئاماژەی بەوە داوە، بەو ئۆپەراسیۆنە پێشمەرگە زیاتر ناوچەکانی ژێر دەسەڵاتی داعشی بەرتەسک کردەوە، شەڕی نێوان داعش و پێشمەرگەشی لە سنووری موسڵ بە شەڕێکی سەخت پێناسە كردووە.
گوتەبێژی فەرماندەیی هێزەکانی ناوەندی ئەمریکا ئاماژەی بە شكستی داعش لە رۆژئاوای كوردستان و سووریاش داوە و رایگەیاندووە، لە کۆتایی مانگی رابردووەوە هێزەکانی سووریای دیموکرات زیاتر لە 100 کلیۆمەتریان لە سنووری منبج کۆنترۆڵ کردووەتەوە.
وەك ئاماژەیەك بۆ هەوڵەكانی ئەمریكا و هاوپەیمانان بۆ لەنێوبردنی داعش جگە لە هێرشە ئاسمانییەكان، پاتریک رایگەیاندووە. زیاتر لە 23 هەزار عێراقی لەلایەن ئەمریکا و هاوپەیمانەکانییەوە راهێنانیان پێکراوە.
روداو
