ئەمڕۆ پێنجشەممە نێچیرڤان بارزانی، سەرۆکی ئەنجومەنی وەزیرانی هەرێمی کوردستان، پێشوازی لە هەیسەم ئەبولفوول كونسوڵی نوێی شانشینی ئوردنی هاشمی لە هەرێمی كوردستان و شاندێكی یاوەری كرد.



لە دیدارێكدا سەرۆك وەزیرانی هەرێمی كوردستان پیرۆزبایی دەستبەكاربوونی لە كونسوڵی نوێی شانشینی ئوردنی هاشمی كرد و هیوای سەركەوتنی لە ئەرك و كارەكانیدا بۆ خواست بەتایبەتی لە بەرەوپێشبردنی پەیوەندییەكانی نێوان هەرێمی كوردستان و ئوردن لە هەموو بوارەكان و ئەو بوارانەی كە بۆ هەردوولا گرنگن.



لای خۆیەوە كونسوڵی نوێی ئوردن خۆشحاڵیی خۆی بە دەستبەكاربوونی لە هەرێمی كوردستان نیشان دا و سوپاسی پێشوازیی گەرمی بەرپرسانی هەرێمی كوردستان كرد و ئاماژەی بەوە دا كە ئەو لە هەرێمی كوردستان وا هەست دەكات لەناو خەڵك و وڵاتی خۆیدایە.



ماڵپەڕی سەرۆکایەتیی حکوومەتی هەرێمی کوردستان، پوختەیەک لە ناوەڕۆکی دیدارەکەی بۆ ئاژانسی باسنیوز ناردووە.



دەقی پوختەی ناوەڕۆکی دیدارەکە:



نیوەڕۆی ئەمڕۆ پێنجشەممە 2-6-2016 نێچیرڤان بارزانی سەرۆك وەزیرانی هەرێمی كوردستان، پێشوزای لە هەیسەم ئەبولفوول كونسوڵی نوێی شانشینی ئوردنی هاشمی لە هەرێمی كوردستان و شاندێكی یاوەری كرد.



لە دیدارێكدا سەرۆك وەزیرانی هەرێمی كوردستان پیرۆزبایی دەستبەكاربوونی لە كونسوڵی نوێی شانشینی ئوردنی هاشمی كرد و هیوای سەركەوتنی لە ئەرك و كارەكانیدا بۆ خواست بەتایبەتی لە بەرەوپێشبردنی پەیوەندییەكانی نێوان هەرێمی كوردستان و ئوردن لە هەموو بوارەكان و ئەو بوارانەی كە بۆ هەردوولا گرنگن.



لای خۆیەوە كونسوڵی نوێی ئوردن خۆشحاڵیی خۆی بە دەستبەكاربوونی لە هەرێمی كوردستان نیشان دا و سوپاسی پێشوازیی گەرمی بەرپرسانی هەرێمی كوردستان كرد و ئاماژەی بەوە دا كە ئەو لە هەرێمی كوردستان وا هەست دەكات لەناو خەڵك و وڵاتی خۆیدایە، هه‌روه‌ها هیوای خواست ببێتە پردێكی پەیوەندیی باش و تۆكمە لە نێوان هەرێمی كوردستان و ئورندا. ئاماژەی بەوەش دا كە ئەوان لە بواری كارگێڕی و ئابووریدا پسپۆڕ و شارەزای زۆریان هەیە و دەتوانێن هاوكاریی هەرێمی كوردستان لە تێپەڕاندنی قەیرانی دارایی بكەن.



هەردوولا گرنگیی پەیوەندییە دووقۆڵییەكانی نێوان هەرێمی كوردستان و ئوردنیان دووپات كردەوە بەتایبەتی لە بوارەكانی تەندروستی و خوێندن و بازرگانی و هەماهەنگیی شەڕی دژی تیرۆر و هەموو ئەو بوارانەی كە دەكرێت خزمەتی هەردوو گەلی كوردستان و ئوردن بكه‌ن.



لە بەشێكی دیكەی دیدارەكەدا شەڕی دژی تیرۆر و قارەمانیی پێشمەرگەی كوردستان بەرامبەر تیرۆرستانی داعش گفتوگۆ كرا و لەمبارەیەشەوە بەڕێز كونسوڵی ئوردن پیرۆزباییی سەركەوتنەكانی لە پێشمەرگە و خەڵك و سەركردایەتیی هەرێمی كوردستان كرد بەتایبەتی ئەو سەركەوتنانەی چەند ڕۆژی ڕابردوو بەسەر تیرۆردا تۆماركران، تێكۆشان و قارەمانێتیی پێشمەرگەی بە مایەی شانازی و پێزانینی هەموو جیهان لەقەڵەم دا و پشتگیری و هاوكاریی ئوردنیشی بۆ هەرێمی كوردستان لە شەڕی دژی داعشدا دووپات كردەوە.



پلانى ئۆپەراسیۆنی ئازادكردنی شاری مووسڵ لە دەست تیرۆرستانی داعش و پرۆسەی سیاسی و بارودۆخی عێراق و ڕەوشی پەنابەران لە هەرێمی كوردستان و ئوردن، لایەنێكی دیكەی دیدارەكە بوو، تیایدا هەردوولا داكۆكییان لەوە كردەوە كە ئاوارە و پەنابەران لە هەرێمی كوردستان و ئوردن پێویستیان بە هاوكاریی زیاتری كۆمەڵگەی نێودەوڵەتییە بەتایبەتی لە عێراق، لەمبارەیەوە سەرۆك وەزیران دووپاتی كردەوە كە عێراق وەك پێویست بەرپرسیارێتیی دۆخی ئاوارە و پەنابەران لە هەرێمی كوردستان هەڵناگرێت و پێویستە ئاوڕێكی جددی لە ئاوارە و پەنابەران بداتەوە.







باسنیوز