ئێكهم پرۆژهیا چاندنا كڤاركان ل دهۆكێ
رێڤهبهریا گشتیا چاندنا دهۆكێ ل دووڤ گۆتنێن ئهندازیارهكى بۆ دوو وهرزان كڤارك ل دهۆكێ چاندن و گۆت: ل دووڤ فهرمانا وهزارتا چاندنێ یا ژماره 9133 ل ڕێكهفتى 27-8-2009 پرۆژهكێ نموونه ل پاریزگهها دهۆكى بهێته دانان و پشتى ل ڕێكهفتى 24-9-2009 گرێبهست هاتیه ئیمزا كرن ل گهل كومپانیا (باران پلاستیك) ژ لایێ وهزارتا چاندنێ ڤه دهست ب كارى خۆ كر و بۆ ماوهیێ دوو وهرزان هاتنه چاندن.
ل دووڤ پێزانێن (باس) ب دهستخۆڤه ئیناین، پشتى پرۆژه ژ دهستێن ڕێڤهبهریێ دهركهفتىدایه دهستێ وهلاتیهكى و ئهو پرۆژه بۆ ماوهیێ سالهكێ برێڤه بر و سهركهفتنهكا گهلهك باش ب دهستخۆڤه نهئینایه.
نژیار عهبدوللا ئهندازیارێ چاندنێ ل دهۆكێ دیار كر، پرۆژه وهكو دهستپێك ل ئێك ژ هولێن ڕێڤهبهریا مه ڤه ل وهرشا تهكنیكى ل سهر ڕووبهرێ 200م2 هاته دانان، بێ گومان ههر پرۆژهكى مفایێن خۆ یێن ههین و ب تایبهت یێن بهرههمهێنهر و براستى وهكو پارێزگهها دهۆكێ پێدڤیهكا باش ب ڤان جۆره پرۆژهیان ههیه، چونكو كڤارك ب بهایهكێ گران ل دهۆكێ دهێته فروتن و پرانیا ڤان كڤاركان ژ دهرڤهى وهلاتى دهێن.
ئهندازیارێ ناڤبرى خویاژى كر، ل دووڤ پێزانینێن وى پرۆژه نههاتیه ڕاوهستاندن، بهلكو وان وهكو ڕێڤهبهریا گشتیا چاندنێ پشتى بۆ ماوێ دوو وهرزان ل گهل كۆمپانیا ب دووماهی هاتى پرۆژهدایه دهستێ كهرتێ تایبهت ل 23-9-2010 پرۆژه بۆ ماوێ دوو وهرزان هاتیه ئیمزاكرن ل گهل وهلاتیهكى، بهلێ ههر دهمێ گرێبهست ب دووماهى هات ل گهل ڤى وهلاتى، مه پلانهكا باش دانایه بۆ بهرفرهكرنا ڤى پرۆژهى.
ئاماژه ب وێ یهكێ كر، تا نوكه چ جوتیاران وهكو پێشینهیا چاندنێ بۆ ڤى پرۆژهى نهوهرگرتیه، بهلكو وان وهكو ڕێڤهبهریا چاندنێ ب ههڤكارى ل گهل ڕێڤهبهریا شیرهتكارى چهند خولێن چاندنا كڤاركا ڤهكرینه و چهندین جوتیاران مفا ژێ وهرگرتیه.
نژیار نهڤهشارت، ب مهرهما خورتكرنا بهرههمێ نافخۆ و كێمكرنا بهرههمێ بیانى د ناڤ بازارىدا، پرۆژهیێ چاندنا كڤاركان ل دهۆكێ هاتبوو دانان. د وهرزێ ئێكێ دێ سێ تهنێن كڤاركا بهرههمئینابوون و بهایێ كیلویهكێ ل قهپانێن فرۆتنا زهرزهواتى 6500 دینار بوون.
ژلایهكێ دیڤه ئهندازیارێ ناڤبرى خۆیاكر كو ئهڤه ئێكهم پرۆژهیه ل دهۆكێ دهێته دانان. چونكو كڤارك حهزژ سهرمایێ دكهت و ل بن پلهیهكا دهستنیشانكرى یا گهرماتیێ دهۆلهكا گرتى دا كیسكێن وان یێن تایبهت هاتینه دانان. ههر كیسكهك ب سێ تهخا هاتینه چاندن، ههر تهخهك جودا دهێته چنین، پلا گهرماتیێ د ناڤ كیسى دا پێدڤیه 28-29 پلهبن و یا هولێ 25 پله بیت.
دیار كر كو 45-50 ڕۆژان ئهڤ كڤاركه دگههیت، دهمێ دگههیت تهخا ئێكێ ههشت ڕۆژان دهێته چنین و پاشى دێ ههشت ڕۆژێن دى خۆ گرن بۆ چنینا تهخا دووێ و ههروهسا بۆ تهخا سیێ ژى. ل دور سهركهفتنا پرۆژهى ئهندازیارێ ناڤبرى گۆت: پروژهى د وهختێ خۆ دا سهركهفتنهكا باش ب دهست خۆ ڤه ئینابوو، چونكو ژ سهرجهمێ 1600 كیسێن هاتینه چاندن، ب تنێ 200 كیس نهشین ببوون و هاتینه ژ ناڤ برن، ژ بهر چهند ئهگهرێن تهكنیكى. وهكو ڕێڤهبهریا گشتى ئهم د ئامادهینه ههر جوتیاركى یان وهلاتیهكێ بڤێت هاریكاریا وى بكهین بۆ دانانا ڤان جۆره پرۆژان.
باسنيوز
