راویژکاری ئەنجومەنی ئاسایشی هەرێمی کوردستان و شاندێکی باڵای ئۆپۆزیسیۆنی سووریا تاوتوێی گەڕانەوەی پێشمەرگەکانی کوردستانی رۆژئاوا بۆ خاکەکەیان، دەکەن.

بەپێی راگەیەندراوێکی ئەنجومەنی ئاسایشی هەرێمی کوردستان، رۆژی سێشەممە 31ـی ئایاری 2016، مەسرور بارزانی، راوێژکاری ئەنجومەن لەگەڵ شاندێکی ئیئتیلافی نیشتیمانیی سووری بە سەرۆکایەتیی ئەنەس عەبدە، سەرۆکی ئیئتیلافەکە و شاندێکی یاوەری، کۆبووەتەوە.

لە کۆبوونەوەکەدا، ئەنەس عەبدە سوپاسی گەل و حکوومەتی هەرێمی کوردستانی کردووە ”لەبەرامبەر حەواندنەوە و پێشکەشکردنی خزمەتگوزارییە بنەڕەتیەکان بە ئاوارەکانی سووریا“.

راوێژکاری ئەنجومەنی ئاسایشی هەرێمی کوردستان و شاندەکەی ئۆپۆزیسیۆنی سووریا باسی پێکەوەژیانی ئاشتییانەی پێکهاتە ئاینی و نەتەوەییەکانی سووریایان کردووە و ”ھەموو جۆرە تاکڕەوی و پاوانخوازییەک“ رەتکردووەتەوە.

بەپێی راگەیەندراوەکە، مەسرور بارزانی و ئەنەس عەبدە بە پێویستیان زانیوە ”ھەموو لایەنەکان لە شەڕی دژ بە تیرۆریستانی داعش و بەدیھێنانی ئایندەیەکی گەش بۆ سووریا و ناوچەکە رۆڵ و پێگەی خۆیان ھەبێت“.

راوێژکاری ئەنجومەنی ئاسایشی هەرێمی کوردستان و شاندەکەی ئیئتیلافی نیشتیمانیی سووریا پشتگیریی خۆیان بۆ گەڕانەوەی پێشمەرگەکانی کوردستانی رۆژئاوا بۆ سەر خاکی خۆیان و بەشداریکردن لە شەڕی داعش لەو پارچەیەی کوردستان و گەڕانەوەکەشیان بە ”پێویست و گرنگ“ داناوە و رۆڵی ئەنجومەنی نیشتیمانی نکورد سووریا (ئەنەکەسە) ”وەک پێکھاتەیەکی سەرەکی و نوێنەری گەلی کورد لە ئیئتلافی نیشتمانی بەرز نرخێندرا“.

بەهۆی شەڕی ناوخۆیی سووریا، کە لە مانگی ئاداری 2011 لە نێوان گرووپەکانی ئۆپۆزیسیۆن و رژێمی سووریا دروست بووە، زیاتر لە 300 هەزار هاووڵاتیی کوردستانی رۆژئاوا و سووریا ئاوارەی هەرێمی کوردستان بوون.

زیاتر لە سێ هەزار گەنجی کوردستانی رۆژئاوا، کە ئاوارەی کوردستانی باشوور بوون، هێزێکی سەربازییان دروست کردووە و وەزارەتی پێشمەرگەی حکوومەتی هەرێمی کوردستانیش مەشقی سەربازی پێکردوون و پێداویستییەکانی بۆ دابین کردوون.

لە سەرەتای هێرشی داعش بۆ سەر کوردستانی باشوور، ئەو پێشمەرگانەی کوردستانی رۆژئاوا شان بەشانی پێشمەرگەی باشوور، بەشدارییان لە شەڕی دژی داعش کردووە.









باسنيوز