لە رێوڕەسمێكی فەرمیدا، (نەوزاد هادی) پارێزگاری هەولێر و (عەبدولحەمید زاهیدی) پارێزگاری سنە، كۆنووسی رێككەوتنێكیان واژۆ كرد كە (عەلی رەشید) سەرۆكی ئەنجوومەنی پارێزگایش تێیدا ئامادە بوو.

ئەم رێككەوتنە، دەرخستەی ئەو بۆچوونانە بوون كاتێك شاندێكی پارێزگاری سنە ماوەی هەفتەیەكە سەردانی هەولێریان كردووە و لەگەڵ پارێزگای هەولێر و ئەنجوومەنی پارێزگا و ژووری بازرگانی و پیشەسازیی پایتەختدا كۆ بوونەتەوە و سەردانی چەندین شوێنی كولتووری و ڕۆشنبیریی ئەو شارەیان كردووە.

رێككەوتن و كۆنووسی لێكتێگەیشتنەكە پێك هاتبوو لە هەماهەنگی و هاوكاریی كولتووری و ئابووری، هەروەها خاڵە سنوورییەكان و پرۆسەی فیركردن و خوێندنیش، بەشێكی گرینگی ئەم رێككەوتنە بوو.

سەرەتا هەردوولا كۆك بوون لەسەر پەرەپێدانی پەیوەندیی برایانە و دۆستانە لە نێوان كۆماری ئیسلامیی ئێران و هەرێمی كوردستاندا، هەروەها پشتیوانیی خۆیشیان دەربڕی سەبارەت بە چالاكیی كەرتی تایبەت لە بوارەكانی كشتوكاڵی و پزیشكیدا.

پارێزگای سنەیش، ئامادەیی خۆیان نیشان دا بۆ ئەوەی میواندارێتیی شاندێك بكەن لە هەرێمی كوردستانەوە، ئەمیش لە پێناو پتەوكردنی پەیوەندییەكانی نێوانیان.

جیا لەوەیش، تیشك خراوەتە سەر چارەكردنی كێشەكانی كۆنتڕۆڵی جۆریی كاڵا و وەرگرتنی پێوەری پێوانەیی و پێكهاتنی لیژنەیەكی هاوبەش لەم بارەیەوە، هەروەها جەخت لە بەهێزكردنی پەیوەندییە كولتووری و رۆشنبیرییەكان كرایەوە.

پشتیوانیی هەردوو لا بۆ هاوكاری و هەماهەنگیی بواری زانستی و فێركاری، خاڵێكی دیكەی رێكەوتننامەكە بوو، جیا لە پاڵپشتیی زیاتری كردنەوەی پیشانگا پسپۆڕییەكان بە ئامانجی بەرزكردنەوەی ئاستی ئابووری و كولتووری و گەشتوگوزاری.








KDP