ئەمشەو ساڵح موسلیم، هاوسەرۆكی پارتی یەكێتی دیموكرات (پەیەدە) سەردانی نەوشیروان مستەفا، رێكخەری گشتیی بزووتنەوەی گۆڕانی كردووە.

شەوی پێنجشەممە 12-5-2016 ساڵح موسلیم بە یاوەری غەریب حەسۆ بەرپرسی پەیەدە لەباشووری کوردستان سەردانی نەوشیروان مستەفای کرد.

لەکۆبوونەوەیەکی یەک کاژێریدا، هەردوولا تاوتوێی رەوشی نێوخۆی رۆژئاوا و باشووری کوردستانیان کرد.

بەپێی زانیارییەکانی رووداو، ساڵح موسلیم جگە لە خستنەڕووی پێشکەوتنەکانی رۆژئاوا و سەرکەوتن و بەردەوامی شەڕڤانان، داوای پشتیوانی لە نەوشیروان مستەفا کردووە.

لای خۆیەوە رێکخەری گشتی گۆڕان، جگەلە خۆشحاڵی و پشتیوانی بزووتنەوەکەی بۆ کوردانی رۆژئاوا، داوای لێکردوون دەست بە یەکڕیزیی و نێوماڵی رۆژئاواوە بگرن.

ساڵح موسلیم جەختیلەوە کردوەتەوە، ئەوەی لەباشووری کوردستان دەگوزەرێت پێویستی بە دیالۆگ و دانیشتنی دۆستانە هەیە، چونکە بەگوتەی ئەو، باش و خراپی رەوشی کوردستان راستەوخۆ کاریگریی لەسەر رۆژئاوای کوردستانیش هەیە.



رووداو