سەرۆكی هەرێمی كوردستان پێشوازی لە وەزیری بەرگریی هەنگاریا دەكات
لە كۆبوونەوەكەدا وەزیری بەرگریی هەنگاریا دیداری لەگەڵ سەرۆك بارزانی بە شەرەفێكی گەورە زانی و سڵاوی سەرۆك كۆمار و سەرۆك وەزیرانی هەنگاریای بە سەرۆك بارزانی گەیاند و پێزانینی بۆ ڕۆڵی سەرۆك بارزانی و هێزی پێشمەرگەی كوردستان هەبوو لە شكستدانی تیرۆریستان و وێڕای ئاماژەدان بەوەی كە وڵاتەكەی بەشێكی چالاكە لە هاوپەیمانێتیی دژی داعش ئەوەیشی خستەڕوو كە بە بێ پێشمەرگە، تیرۆریستانی داعش تووشی شكست و پاشەكشە نەدەبوون. ئاماژەیشی بەوەدا كە پێشمەرگە بۆ ئازادی دەجەنگێ و جەختیشی لەوە كردەوە كە وڵاتەكەی ئاگاداری تەحەدیاتی ئابووری و ئەمنیی كوردستانە و بەردەوام دەبێ لە پاڵپشتیكردن و هاوكاریكردنی سەربازیی هێزی پێشمەرگەی كوردستان و چارەسەركردنی بریندارن.
لەبەرانبەردا سەرۆك بارزانی بەگەرمی بەخێرهاتنی شاندی میوانی كرد و سوپاسی سەرۆك و حكوومەت و گەلی هەنگاریای كرد بۆ پشتیوانیان لە هەرێمی كوردستان و ستاییشی خەباتی گەلی هەنگاریای كرد بۆ گەییشتن بە ئازادی. سەرۆك بارزانی لە وتەیەكدا باسی لە هەڕەشەی تیرۆریستانی داعش كرد كە مەترسییە بۆ سەر هەموو جیهان و ژیانی مرۆڤایەتی و جەختی لەوە كردەوە كە بۆ لەناوبردنی تیرۆر هەوڵێكی هەمەلایەنەی دەولی و ڕێكوپێك پێویستە لە هەموو بوارەكانی سەربازی و فكری و سیاسی و ئابووریدا. سەرۆك بارزانی باسی لە سەركەوتنەكانی هێزی پێشمەرگە و شكانی ئەفسانەی داعش و هەروەها ئەو تەحەدیاتە ئابووری و سەربازییانە كرد كە ڕووبەڕووی گەلی كوردستان بوونەتەوە و ئەوەیشی خستەڕوو كە حكوومەتی عێراقی لە ڕووبەڕووبوونەوەی داعش و حەواندنەوەی ملیونێك و هەشتسەد هەزار ئاوارە وەك پێویست یارمەتیی هەرێمی كوردستانی نەداوە.
لە درێژەی وتەكەیدا سەرۆك بارزانی باسی لە داواكارییە ڕەواكانی گەلی كوردستان كرد و ئەوەی دووپاتكردەوە كە ویست و داواكاریی گەلی كوردستان ئاشتیانەیە و ئەزموونیش سەلماندوویەتی كە هەرێمی كوردستان سەرچاوەی سەقامگیرییە نەك هەڕەشە بۆ ناوچەكە.
هەر لەو كۆبوونەوەیەدا باس لە سرووشتی شەڕی تیرۆریستان و ئامادەكارییەكان بۆ ئازادكردنی موسڵ و قۆناغی دوای شەڕی داعش و هەروەها بارودۆخی سیاسی و دوا گۆڕانكارییەكانی ناوچەكە كرا.
جێگەی ئاماژەپێدان لەم كۆبوونەوەیەدا ژمارەیەك لە بەرپرسە ئەمنی و سەربازی و سیاسییە باڵاكانی هەرێمی كوردستان ئامادە بوون.
