سەرۆك بارزانی، سه‌رۆكی هه‌رێمی كوردستان به‌بۆنه‌ی ڕۆژی جیهانی كرێكارانه‌وه‌ په‌یامێك بڵاوده‌كاته‌وه‌.



په‌یامه‌كه‌ی سەرۆك بارزانی له‌ په‌یجی فه‌رمی خۆی له‌ تۆڕی كۆمه‌ڵایه‌تی فه‌یسبووك بڵاوكراوه‌ته‌وه‌ و له‌ به‌شێكیدا هاتووه‌"بێگومان ئەو وڵاتە دەتوانێ لەڕووی ئابوورییەوە پێشبكەوێت كە كرێكاران بە ئاسوودەیی بتوانن خزمەتی وڵاتی خۆیان بكەن بێ ئەوەی مافەكانیان پێشێل بكرێت و سەندیكا و ڕێكخراوە داكۆكیكارەكانیان بەهێز و چالاك بن".



ئه‌مه‌ی خواره‌وه‌ ده‌قی په‌یامه‌كه‌ی مه‌سعود بارزانی ، سه‌رۆكی هه‌رێمی كوردستانه‌:-



بەبۆنەی ڕۆژی جیهانیی كرێكاران، گەرمترین پیرۆزبایی خۆم ئاراستەی كرێكارانی خۆشەویستی كوردستان و هەموو كرێكارانی جیهان دەكەم و هیوای خۆشی و بەختەوەرییان بۆ دەخوازم.



كرێكاران چینێكی ماندوو و خاوەن مافی كۆمەڵگان و ڕۆڵی سەرەكی و بنیاتنەریان لە گەشەپێدانی ئابووری و پێشكەوتنی وڵات و ئاوەدانیدا هەیە. بێگومان ئەو وڵاتە دەتوانێ لەڕووی ئابوورییەوە پێشبكەوێت كە كرێكاران بە ئاسوودەیی بتوانن خزمەتی وڵاتی خۆیان بكەن بێ ئەوەی مافەكانیان پێشێل بكرێت و سەندیكا و ڕێكخراوە داكۆكیكارەكانیان بەهێز و چالاك بن. خەبات و تێكۆشانی كرێكاران بۆ بەدیهاتنی دادپەروەری و داواكارییەكانیان ڕەوان و پێویستە هەموو لایەكمان پشتگیری لە ماف و داواكارییەكانیان بكەین لە هەردوو كەرتی تایبەت و گشتیدا.



بە پێویستی دەزانم لەم بۆنەیەدا سوپاسی ئەرك و ماندووبوونی كرێكارانی ئازیزی كوردستان بكەم كە هەمیشە تەحەمولی قەیرانی دارایی و دۆخە سەختەكانیان كردووە و بەردەوامن لە خزمەتكردنی وڵاتەكەیان.