یەکەم مۆزەخانە بۆ کەلوپەلی شەهیدانی پێشمهرگه کرایەوە
لەو مەراسیمەدا کە خانەوادە و کەسوکاری شەهیدان و هاورێ و هاوسەنگەرانیان ئامادەی بوون محمودی حاجی ساڵەح وەزیری شەهیدان و ئەنفالکراوان وتەیەکی پێشەکەش کرد و وێرای دەستخۆشی لە مۆنۆمێنتی ئەنفال هەوڵەکانیانی بۆ ناساندنی تاوانەکانی دژ بە گەلی کورد خستە روو .
فریارڵ فەیسەڵ ، خاوەنی بیرۆکەکە راگەیاند " ماوەی دوو ساڵە بە هاوکاری کەسوکاری شەهیدان سەرقاڵی کۆکردنەوەی کەلوپەل و پارە و جل و بەرگی سەربازی شەهیدەکانم کە لە دوای خۆیان بەجێیان هێشتووە، هەروەها ماوەیەکە سەرقاڵی دۆزینەوەی شوێنێکی گونجاوین و بە هاوکاری قائیمقامی چەمچەماڵ و مۆنۆمێنتی ئەنفال ئەمرۆ پێشکەشی مۆنۆمێنتی ئەنفالمان کرد لە قەزای چەمچەماڵ".
وتیشی " لەم مۆزەخانەیەدا کەلوپەلی ٢٠٠ پێشمەرگەی شەهید دانراوە بۆ ئەوەی بە شاراوەیی نەهێڵریتەوە و نوێنەری وڵاتان و میوانانی دەرەکی بتوانن بیبین و سەردانی بکەن".
هەر لەو مەراسیمەدا پرۆتۆکۆڵی پێشکەشکردنی کەلوپەلەکان لەلایەن وەزیری شەهیدان و مۆنۆمێنتی ئەنفال و فریال فەیسەڵەوە واژۆکرا و خەڵاتی رێزلێنانی مۆنۆمێنتی ئەنفال پێشکەشی ئەو خاتوونە کرا لە بەرامبەر هەوڵەکانی و پاراستنی کەلوپەلی شەهیدان .
لای خۆیەوە هابیل ئەحمەد، بەرێوەبەری مۆنۆمێنتی ئەنفال بە خەندانی راگەیاند "ئەمرۆ مۆزەخانەیەکی تایبەت بە کەلوپەلی شەهیدان و یادگاریەکانیان لە مۆنۆمێنتی ئەنفال لە قەزای چەمچەماڵ کرایەوە و رۆژانە و بە رۆژە پشوەکانیشەوە کراوە دەبێت بۆ ئەوەی وەفدە بیانیەکان بتوانن سەردانی بکەن".
وتیشی " هەوڵدەدەین لە قۆناغی داهاتوودا مۆزەخانەکە فراوانتر بکەین و لێرەشەوە داوا لە سەرمایەدارەکان دەکەین کە ئەمە سەروەتێکی نیشتیمانیە با هاوكاربن و ئەم یادەوەریانە بۆ نەوەی داهاتوو بپارێزین".
