سەرۆکی هەرێمی کوردستان فەرمان لە بارەی پێداچوونەوە بە مووچەی پلە تایبەتەکان لەناو وەزارەتی پێشمەرگە دەدات و بەپێی فەرمانەکە، هەرچی زیادەڕۆییەک لەم بوارەدا هەبێت، ڕابگیرێت.

سەرچاوەیەکی ناو وەزارەتی پێشمەرگەوە : مەسعود بارزانی، سەرۆکی هەرێمی کوردستان، فەرمانی داوە، پێداچوونەوە بە مووچەی پلەتایبەتەکانی هێزی پێشمەرگە بکرێت و لەمبارەیەوە لێژنەیەک بۆ پێداچوونەوە و لادانی زیادەڕۆیی لەناو وەزارەتی پێشمەرگە پێکهێندراوە. چاوەڕوانیش دەکرێت لە ماوەی داهاتوو، لێژنەکە ڕاپۆرتی خۆیان ئاراستەی سەرۆکی هەریمی کوردستان بکەن و فەرمانی کۆتایی لەمبارەیەوە بدرێت.

لەلایەن خۆیەوە جەبار یاوەر، ئەمینداری گشتیی وەزارەتی پێشمەرگە، لە لێدوانێکیدا بۆ (باسنیوز)، زانیارییەکانی ڕەت نەکردەوە و پشتڕاستیشی نەکردەوە، بەڵکو گوتی: “ئێمە خۆشمان وەک وەزارەت، چاکسازیمان دەست پێ کردووە و لێژنەمان داناوە، بۆ ئەوانەی لە ئەرکەکانیاندا خانەشین کراون و مووچەی پلە تایبەتیان هەیە، دەمانەوێت پێداچوونەوەیەکی تەواو بکەین”.