سکرتێری ناتۆ: دەمانەوێ هێزی پێشمەرگە بەهێزتر بکەین، چونكە پێشمەرگە رۆڵێکی گرنگ لە شەڕی دژی داعش دەگێڕێت
ینز ستۆلتنبێرگ، سكرتێری گشتیی ناتۆ رایگەیاندووە، کە هێزی پێشمەرگەی کوردستان رۆڵێکی گرنگ و کارا لە شەڕی دژی رێکخراوی توندڕەوی داعش دەبینێت.
ینز ستۆلتنبێرگ، هەروەها رایگەیاندووە، راوێژکارانی سەربازیی چەند وڵاتێکی ئەندامی هاوپەیمانییەکە راهێنان و مەشقی سەربازی بە هێزەکانی پێشمەرگە دەکەن و ئەمەشی وەک بەشێک لە هەوڵەکانی بۆ دژایەتیکردنی داعش دادەنێت.
سکرتێری گشتیی ناتۆ بەڵێن بە هێزەکانی پێشمەرگە دەدات، کە هاوکارییە سەربازییەکان بەردەوام بێت و هەوڵەکانیان زیاتر، باشتر و رێکخراوتر دەبێت و رایگەیاند، ”ئێمە دەمانەوێ هێزەکانی پێشمەرگە و ناوچەکە لە دژی داعش بەهێزتر بکەین“.
ناتۆ، هاوپەیمانییەکی سەربازیی ئەمریکا و وڵاتانی ئەوروپایە و بە مەبەستی بەرگریکردن لە وڵاتانی ئەوروپا لە ساڵی 1949دروست کراوە.
فەرەنسا، ئیتاڵیا، بەلجیکا، هۆڵەندا و ئەڵمانیا و چەند وڵاتێکی دیکە، کە ئەندامی ناتۆن، بە کەلوپەلی سەربازی و چەک و تەقەمەنی و ناردنی راوێژکاری سەربازی بۆ مەشقکردن، هاوکاریی هەرێمی کوردستان و هێزی پێشمەرگەیان لە شەڕی دژی داعش کردووە.
باسنیوز
