فڕۆکە جەنگییەکانی هاوپەیمانان لە دوو پارچەی کوردستان 41 گورزی ئاسمانی لە رێکخراوی توندڕەوی داعش دەدەن.



بەپێی راگەیەندراوێکی کونسوڵخانەی گشتیی ئەمریکا لە هەرێمی کوردستان، لە ماوەی 19ـی ئاداری 2016 تاوەکو 25ـی ئادار، فڕۆکە جەنگییەکانی هاوپەیمانان 111 جار هێرشی ئاسمانییان کردووەتە سەر بنکە و بارەگاکانی داعش لە کوردستانی باشوور و عێراق.



هەر لە راگەیەندراوەکەدا هاتووە، کە لەو ماوە دیاریکراوەکدا، فڕۆکە جەنگییەکانی هاوپەیمانان 28 هێرشی ئاسمانییان کردووەتە سەر بنکە و بارەگاکانی داعش لە کوردستانی رۆژئاوا و سوریا.



هەروەک کونسوڵخانەی گشتیی ئەمریکا لە هەرێمی کوردستان/ هەولێر ژمارەی هێرشە ئاسمانییەکانی ئاشکرا کردووە، لە کوردستانی باشوور لە ناوچەکانی پارێزگای کەرکووک، گوندی سوڵتان عەبدوڵڵا، شارەدێی کەسک، شاری تەلەعفەر و شاری شنگال 35 جار بنکەکانی داعش بۆردومان کراون.



هەروەها فڕۆکە جەنگییەکانی هاوپەیمانان لە کوردستانی رۆژئاوا شەش هێرشی ئاسمانییان کردووەتە سەر بارەگاکانی داعش لە کۆبانێ، عەین عیسا و ناوچەیەکی سەر سنووریی نێوان کوردستانی باشوور و رۆژئاوا.



دوای هێرشی داعش بۆ سەر کوردستانی باشوور لە مانگی حوزەیرانی 2014، ژمارەیەک وڵاتی ئەوروپی بە سەرکردایەتیی ئەمریکا هاوپەیمانییەکیان پێکهێنا، کە ئەرکیان بۆردومان کردنی بنکە و بارەگاکانی داعشە لە کوردستانی باشوور و رۆژئاوا و سوریا و عێراق لە رێی فڕۆکە جەنگییەکانەوە.





باسنیوز