گوتەبێژی حکوومەتی هەرێمی کوردستان ڕای گەیاند، سکرتێری گشتیی نەتەوە یەکگرتووەکان، پشتیوانیی خۆی بۆ سەرکردایەتیی سیاسیی کوردستان دەربڕیوە.



سەفین دزەیی، گوتەبێژی حکوومەتی هەرێمی کوردستان، ڕاگەیاند: کۆبوونەوەکەی دوێنێ شەممە 26\3\2016ی نێوان “سەرۆك بارزانی”، سەرۆکی هەرێمی کوردستان و “بان کی مۆن”، سکرتێری گشتیی ڕێکخراوی نەتەوە یەکگرتووەکان، کۆبوونەوەیەکی گشتگیر بوو و بان کی مۆن هەڵوێست و خۆڕاگریی هەرێمی کوردستانی لە ماوەی ئەو چەند ساڵەی ڕابردوودا بەرز نرخاند".



ئەوەشی ڕوون کردەوە کە سکرتێری گشتیی نەتەوە یەکگرتووەکان لە کۆبوونەوەکەدا گوتوویەتی: "پێشمەرگەی کوردستان بە کردەوە سەڵماندوویەتی کە بەرگری لە مرۆڤایەتی دەکات و بەرەو ڕووی ڕێکخراوی تیرۆریستیی داعش بووەتەوە". گوتیشی: “بان کی مۆن لە کۆبوونەوەکەدا جەختی لەوە کردەوە کە پشتگیری لە سەرکردایەتیی هەرێمی کوردستان دەکەن و هەڵوێستی حکوومەتی هەرێمی کوردستانی بەرز نرخاند”.



سەفین دزەیی لە لێدوانەکەیدا ئاماژەی بەوە کرد، هەرێمی کوردستان لەگەڵ بوونی قەیرانی دارایی و شەڕی داعش، هاوکات ئەو ژمارە زۆرەی ئاوارەی لەخۆ گرتووە، بۆیە نەتەوە یەکگرتووەکان ڕێز لەم کارانەی هەرێمی کوردستان دەگرێت و لە پشتیوانییەکانی خۆی بۆ هەرێمی کوردستان بەردەوام دەبێت. ئەوەشی ئاشکرا کرد: “جیم یۆنگ کیم، سەرۆکی بانکی نێودەوڵەتی کە لەو سەردانەدا یاوەریی بان کی مۆنی دەکرد، هەڵوێستی حکوومەتی هەرێمی کوردستان و پێشمەرگەی بە جومێرانە وەسف کرد".



گوتەبیژی حکوومەتی هەرێمی کوردستان، دووپاتیشی کردەوە، سکرتێری ڕێکخراوی نەتەوە یەکگرتووەکان و سەرۆکی بانکی نێودەوڵەتی، پشتگیریی خۆیان لە بڕیارەکانی سەرۆکی هەرێمی کوردستان بۆ جێبەجێکردنی چاکسازی لە هەرێمی کوردستان دەربڕی.







باسنیوز