سەرۆکایەتیی هەرێمی کوردستان لەبارەی تەقینەوەکەی شاری بابل لە خوارووی بەغدا، راگەیەندراوێک بڵاودەکاتەوە.



لە راگەیەندراوەکەدا، کە وێنەیەکی گەیشتووەتە باسنیوز، سەرۆکایەتیی هەرێمی کوردستان وێڕای ئیدانەکردنی ئەنجامدەرانی تەقینەوەکە، ”سەرەخۆشی و ھاوسۆزیی“ش بۆ کەسوکاری کوژراو و برینداربووان رادەگەیەنێت.



سەرۆکایەتیی هەرێمی کوردستان لە راگەیەندراوەکەیدا، ئاماژە بەوەش دەکات، کە ”دواجار تیرۆریستان شکست و ڕووڕەشیان بۆ دەمێنێتەوە“ و بۆ ئەم مەبەستەش، هەرێمی کوردستان و عێراق ”لە شەڕی دژی تیرۆر، هەماهەنگیی و هاوکاریی یەکتر دەکەن“.



ئێوارەی رۆژی هەینی 24ـی ئاداری 2016، تەقینەوەیەک لە یاریگایەکی تۆپی پێی لە شارەدێی ئەسکەندەرییە لە باکووری پارێزگای بابل روویدا و بووە هۆی کوژران و برینداربوونی دەیان کەس.



دوای تەقینەوەکە، رێکخراوی توندڕەوی داعش بەرپرسیارێتی خۆی لە تەقینەوەکە راگەیاند.



پارێزگای بابل دەکەوێتە 100 کیلۆمەتریی باشووری بەغدای پایتەختی عێراق و بە بەراورد بە پارێزگاکانی دیکەی عێراق، یەکێک بوو لە شارە ئارامەکان.





باسنیوز