وته‌بێژی‌ به‌ڕێوه‌به‌رایه‌تی‌ هاتوچۆی‌ هه‌ولێر رایگه‌یاند، له‌ماوه‌ی‌ سێ‌ رۆژی‌ جه‌ژنی‌ نه‌ورۆزدا حه‌وت رووداوی‌ هاتوچۆ رویانداوه‌ و به‌هۆیه‌وه‌ كه‌سێك گیانی‌ له‌ده‌ستداوه‌و 11 كه‌سی‌ دیكه‌ش برینداربووه‌.

رائید فازڵ حاجی‌ وته‌بێژی‌ به‌ڕێوه‌به‌رایه‌تی‌ هاتوچۆی‌ هه‌ولێر له‌كۆنگره‌یه‌كی‌ رۆژنامه‌وانیدا ئه‌مڕۆ پێنجشه‌ممه‌ رایگه‌یاند، پلانه‌كه‌مان به‌سه‌ركه‌وتوویی‌ جێبه‌جێكرا و خه‌ڵكی‌ هه‌ولێریش پابه‌ندی‌ پلانه‌كانی‌ هاتوچۆ بوون، به‌ڵام به‌داخه‌وه‌ هه‌ندێک‌ رووداوی‌ هاتوچۆ روویاندا هه‌رچه‌نده‌ رووداوه‌كان كه‌متر بووه‌، به‌ڵام ژماره‌ی‌ قوربانیان زیاتر بووه‌.

وتیشی:‌ "له‌كۆی‌ 7 رووداوی‌ هاتوچۆ 11 هاوڵاتی‌ برینداربوو، یه‌ك هاوڵاتیش گیانی‌ له‌ده‌ستداوه‌ و پێنج له‌رووداوه‌كان له‌ده‌ره‌وه‌ی‌ شار بووه‌ و یه‌كێكیان به‌هۆی‌ سه‌رخۆشی‌ و یه‌كێكیش به‌هۆی‌ ماتۆرسكلیه‌وه‌ بووه‌".

وته‌بێژی‌ به‌ڕێوه‌به‌رایه‌تی‌ هاتوچۆی‌ هه‌ولێر ره‌تیشیكرده‌وه‌، گه‌شتیارانی‌ عه‌ره‌ب كێشه‌ی‌ هاتوچۆیان دروستكردبێت، چونكه‌ ئه‌وان له‌رێگه‌ی‌ كۆمپانیا گه‌شیاریه‌كان و پاسی‌ تایبه‌تی‌ گه‌شتیاریەوە هاتوون.