زانكۆیەكی كوردستان بڕیاری شكاندنی بایكۆتی دا
ئەمڕۆ یەکشەممە 28-2-2016 ئەنجوومەنی زانكۆی راپەڕین لەكۆبوونەوەی ئاسایی خۆیدا بڕیاریدا، لەسەرجەم فاكەڵتی و سكوڵ و بەشەكانی زانكۆی راپەڕین دەوامی رەسمی لە رۆژی سێشەممە 1-3-2016 دەستپێبكاتەوە.
ئاراز رەمەزان، گوتەبێژی زانکۆی راپەڕین سەبارەت بە شکاندنی بایکۆت بە ( تۆڕی میدیایی رووداو)ی راگەیاند، لەسەر داواكاری خوێندكاران و لەپێناو بەرژەوەندی خوێندكاران و لەدەستنەچوونی ساڵێكی خوێندنیان، لەسەرجەم فاكەڵتی و سكوڵ و بەشەكانی زانكۆی راپەڕین دەوامی فەرمی لە رۆژی سێشەممە 1-3-2016 دەستپێبكاتەوە.
گوتەبێژی زانکۆی راپەڕین گوتیشی "لە کۆبوونەوەکەدا بەیاننامەیەکمان بڵاوکردووەتەوە و چەند بڕیارێکمان لەپێناو خوێندكارەكان و هەستكردن بە بەرپرسیارێتی نیشتمانی و لەدەستنەدانی چارەنووسی ساڵێكی خوێندنیان دەرکردووە".
بڕیارەکانی ئەنجوومەنی زانكۆی راپەڕین.
1. دەستپێكردنەوەی دەوام لەسەرجەم فاكەڵەتی و سكوڵ و بەشەكان لەرۆژی سێشەممە 1-3-2016ـەوە.
2. بۆ قەرەبووكردنەوەی ئەو ماوەیەی لە سایەی بایكۆتكردندا لەدەستچووە بڕیاردرا تاوەكو رۆژی 17-3-2016 لەمیانی پشووی بەهارەدا خوێندن بەردەوام بێت و لەرۆژی 18-3-2016ـەوە پشووی بەهارە دەستپێبكات تاوەكو رۆژی 25-3-2016 واتە رۆژی 26-3-2016 دەوامی ئاسایی دەستپێدەكاتەوە.
3. پشتگیری لەپرۆژە پێشنیازكراوەكەی وەزارەتی خوێندنی باڵا و توێژینەوەی زانستی دەكەین سەبارەت بە سیستەمی مووچە.
4. ئەم بەیاننامەیە دوا بڕیار نییە و بەپێی قۆناخی داهاتوو ئەگەر حكومەتی هەرێمی كوردستان داواكاری مامۆستایانی زانكۆ پشتگوێبخات ئەوا هەڵوێست و بڕیاری دیكەمان دەبێت.
زانکۆی راپەڕین لە ساڵی 2010 دامەزراوە و یەکەم خولی دەرچوانیش لە ساڵی 2011-2012 بووە. ئێستا نزیکەی 5000 خوێندکار لەو زانکۆیە دەخوێنن و لە چوار فاکەڵتی و یەك سکوڵ پێکهاتووە، لەگەڵ چەند ناوەندێکی توێژینەوە.
زانکۆی راپەڕین لە ساڵی 2013 لەلایەن وەزارەتی خوێندنی باڵا و توێژینهوهی زانستیی حکومهتی عێراقەوە بە فەرمی دان بە زانكۆی راپەڕین نرا و، خرایه ناو لیستی زانكۆ باوەڕپێكراوەكانی عێراقەوە.
رووداو
