مەحموود محەممەد: ئۆرگانەكانی پارتی، پشتگیریی بڕیارەكانی سەرۆك دەكەن
(مەحموود محەممەد) پەیوەست بە كۆبوونەوەی ئەنجوومەنی سەركردایەتیی پارتی گوتی: "بەردەوام لەو گۆڕانكاریانەی كە لە رووی سیاسی و پرۆسەی سیاسیدا باوە، هەروەها لەو ئاڵۆزییەی كە ئێستا لە ناوچەكەدا بوونی هەیە، پێویست بەوە دەكات بەردەوام كۆبوونەوە هەبێت بۆ ئەوەی تاوتووی ئەگەر و چارەكردنی ئەو كێشانە بكرێت، كۆبوونەوەكەیش بە دڵنیاییەوە پەیوەست دەبێت بە بارودۆخی ئێستای ناوچەكە و كوردستان و هەروەها ئەو بڕیارانەی كە جەنابی سەرۆك داویەتی سەبارەت بە چاكسازی لە هەرێمی كوردستان، چ لەناو حكوومەتی هەرێمی كوردستان چ لەوەی كە پەیوەندی بە ناوخۆی پارتی دیموكراتی كوردستانەوە هەیە".
سەبارەت بە چاكسازییەكانی ناو حكوومەت و ناو پارتییش، (مەحموود محەممەد) گوتی: "ئەوە زیاتر دەمێنێتەوە بۆ ئەو بڕیارانەی كە دەدرێت، لەبارەی حكوومەتیشەوە ئەوە بەو شێوەیە پەیوەندی بە كۆبوونەوەكەی ئێمەوە نییە، چونكە پەیوەستە بە حكوومەت و ئەو دامودەزگا ڕەسمیانەی كە هەیەتی، چ وەكو دەزگای نەزاهە یان چاودێریی دارایی یاخود مەحاكم، ئەوانە لەگەڵ سەرۆكایەتیی ئەنجوومەنی وەزیران و لەگەڵ (سەرۆك بارزانی) رێوشوێنی تایبەت بە چۆنیەتیی جێبەجێكردنی دیاری دەكەن، پێوەست بەوەی پارتی دیموكراتی كوردستانیش، پێویستی بە گفتوگۆ هەیە، چی ئەوانەی مەكتەبی سیاسی كە ئەنجام درا یاخود ئەوەی كە رۆژی شەممە ئەنجوومەنی سەركردایەتیی پارتی كۆ دەبێتەوە و گفتوگۆی ئەم بابەتەیش دەكرێت".
(مەحموود محەممەد) پێوەست بە بریارەكانی چاكسازی لەم قۆناغەدا، دەڵێت: "ئەم بارودۆخە زۆر جیاوازە لەگەڵ بارودۆخەكانی پێشوو، بارودۆخەكە وادەكات كە دەبێت چاكسازیی باش و گونجاو لەگەڵ بارودۆخەكەدا ئەنجام بدرێت، بۆیە بە دڵنیاییەوە ئەم هەنگاوە دەنرێت و تەواوی ئۆرگانەكانی خزبیش پشتگیریی بریارەكانی (سەرۆك بارزانی) دەكەن".
بەرپرسی دەزگای رۆشنبیری و راگەیاندنی پارتی دیموكراتی كوردستان، پێوەست بەوەی كە هەرێمی كوردستان بەرەو كوێ هەنگاو دەنێت، دەڵێت: "ئەوە پەیوەندی بە پرۆسەی سیاسیی ناوخۆی خۆمانەوە هەیە لەلایەك، هەروەها پەیوەندی بە خوێندنەوە و ئەو عەقڵییەتانەوە هەیە كە بەشدارن لە پرۆسەی سیاسیدا، لەلایەكی دیكەیشەوە پەیوەندی بە دید و بۆچوون و خوێندنەوەی زلهێز و وڵاتانی بەشدار لەو ئاڵۆزییە هەیە كە هاتوون بۆ چارەسەر یان ئەوانیش بەشێكن لە ئاڵۆزی، پەیوەندی بە ئەوانیشەوە هەیە كە ئەوان چۆن لەو بارودۆخە تێدەفكرن، ئایا خوێندنەوەی ئەوانیش وەكو ئەو خوێندنەوەیەیە كە ئێمەی كورد هەمانە بۆ قەزیەكان، یاخو جیاوازییان هەیە، بۆیە دەبێت ئێمە ئامادەییەكی باشمان هەبێت و هاوتەریب لەگەڵ ئەوان هەنگاو بنێین بۆ ئەوەی وجوودی ئێمە وا بخوێندرێتەوە كە پێویستن بۆ ئەو كێشانەی كە لە ناوچەكەدا روو دەدەن، بۆ ئەوەیش پێویستمان بە یەكڕیزی و تەبایی و یەكگوتاری هەیە،
سەبارەت بە كێشە گرنگەكان، ئەگەر لەسەر هەندێك شتی ناوخۆییش جیاوازیمان هەبێت، لە چۆنیەتیی چارەكردنی گرفتەكاندا، بەڵام دەبێت جیاواز نەبین لە چۆنیەتیی چارەكردنی كێشە نەتەوەیی و نیشتمانییەكانمان و ئەو ئاڵۆزیانەی كە لە ناوچەكەدا هەن،
بە تایبەت ئەو جەمسەربەندییەی كە لە ناوچەكەدا بەدی هاتووە، بەوەی كە چەند وڵاتێك پێكەوە هاوپەیمانەتییەكیان دروست كردووە و لەلایەكی تریشەوە چەند وڵاتێكی دیكە هاوپەیمانەتییان دروست كردووە پێكەوە، هەموویشیان بە ناوی دژایەتیی داعش و ئیرهاب هاتوونەتە مەیدان بەو چەكانەی كە هەیانە و خەریكی ئەوەن ئەو گرفتەی كە لە ناوچەكەدا هەیە، هەریەك لە روانگای خۆیەوە بۆ چارەكردنی هەوڵ دەدات، بۆیە دەبێت ئێمە هەوڵ بدەین رەقەمێكی وا بین كە بخوێندرێینەوە، ئەو خوێندنەوەیەیش وەها بێت كە ئیعتباری خۆمان ئەوەندەی كە لە ساڵانی پێشوودا دروستمان كردووە، هەبێت".
