بەرپرسی پێوەندییە عێراقی و نیشتمانییەکانی پارتیی دیموکراتی کوردستان، ڕایگەیاند، لە ئەنجامی ڕێککەوتنی ستراتیژی پارتی و یەکێتی زۆر کاری باش پێکەوە کراوه‌، یەکێک لەو کارانە ئۆقرە و ئاساییش بۆ هەموو هەرێمی کوردستان گەڕایەوە، به‌ڵام وێستگەی دوای هەڵپەساردنی ڕێککەوتنی ستراتیژی لەو چەند ساڵەی دوایی، بەتایبەتی لەو دوو سێ ساڵەدا، ئەگەر بەراورد بکەین، دیسان نائارامی و پەرتەوازەیی، دیسان لێدانی پێگەی کورد و، ئەو ئاژاوەیەی نایانەوە، بە تایبەتی لە ناوچەکانی سلێمانیدا، ئەوە لە هەڵپەساردنی ئەو ڕێککەوتنەوە پەیدا بوو.

(ئەحمەد کانی) بەرپرسی پێوەندییە عێراقی و نیشتمانییەکانی پارتیی دیموکراتی کوردستان لە لێدوانێکدا بۆ ماڵپەڕی فەرمیی پارتیی دیموکراتی کوردستان ڕایگەیاند: "پارتیی دیموکراتی کوردستان و یەکێتیی نیشتمانیی کوردستان مێژوویەکی دوورودرێژیان پێکەوە هەیە، بە ڕاستی لە ئەنجامی ڕێککەوتنی ستراتیژی کاری زۆر باشیان کرد، یەک لەو کارە باشانە ئارامی بۆ هەموو هەرێمی کوردستان گەڕایەوە، لە سای ئەو ڕێککەوتنەدا ئارامی و پێشکەوتن هەموو هەرێمی کوردستانی گرتەوە، هەر لە زاخۆ بگرە تا خانەقین ئەوە خاڵێکی گرینگ بوو، ئاساییش زۆر باش پارێزرابوو، ئێستایش هەر زۆر باش پارێزراوە، توانیمان لە دەرئەنجامی ڕێککەوتنی ستراتیژی پێگەی کورد لە بەغدا لە کاتی ئازادکردنی عێراق لە ساڵی 2003 زۆر بە هێزەوە بچینە ناو پرۆسەی سیاسی عێراقەوە، ئەو کاتە (سەرۆک بارزانی) و (مام جەلال) لە بەغدا بوون و کاریان کرد، بە ڕاستی بووە جێگەی سەرنجی هەموو نەیاران، ئەوە بوو کە توانرا مافی کورد زۆر بە ڕێکوپێکی لە دەستووری عێراقی بچەسپێت و 80% گەلانی عێراق دەنگی بۆ بدات، ئەوە دەسکەوتێکی مێژووییە، بەشداریی کورد لە حوکمی عێراقدا، لە حکوومەت، ئەنجوومەنی نوێنەران، ئەویش هەر بەهێزکردنی پێگەی کوردە لەسەر ئاستی نێودەوڵەتییدا."

گوتیشی: "بنبڕکردنی شەڕی ناوخۆ ئەوەیش دەسکەوتێکی گەورە بوو، کە دوای شەڕی ناوخۆ یەکڕیزی ناو ماڵی کورد، بەهێزکردنی پێگەی ئابووریی کوردستان،؛ با لەبیر نەکەین ئەو ڕۆژەی کە (سەرۆک بارزانی) و (مام جەلال) ئامادە بوون لە هۆڵی سەعد عەبدوڵڵا بۆ هەناردەکردنی نەوتی هەرێمی کوردستان ڕۆژێکی مێژوویی بوو."

(ئەحمەد) ئاماژەی بەوەش کرد وێستگەی دوای هەڵپەساردنی ڕێککەوتنی ستراتیژی لەو چەند ساڵەی دوایی، بەتایبەتی لەو دوو سێ ساڵەدا، ئەگەر بەراورد بکەین، دیسان نائارامی و پەرتەوازەیی، دیسان لێدانی پێگەی کورد و، ئەو ئاژاوەیەی نایانەوە، بە تایبەتی لە ناوچەکانی سلێمانیدا، ئەوە لە هەڵپەساردنی ئەو ڕێککەوتنەوە پەیدا بوو."

(کانی) دەیشڵێ: "ئێمە ناڵێین ڕێککەوتنی ستراتیژی ڕێککەوتنێکە هەموو خاڵ و دەقەکانی دروستە، بە تایبەت لەگەڵ گۆڕانی کات و پێشهاتەکان؛ لەوانەیە هەندێک خاڵ پێویستیان بە هەندێک گۆڕانکاری هەبێت بۆ ئەوەی بگونجێت لەگەڵ ئەو ڕووداوانەی ئێستا، بەڵام هاوکاری و تێگەیشتنی نێوان یەکێتی و پارتی لە یەکتر زامنێکی گەورەیە بۆ پاراستنی ئەم ئەزموونەی هەرێمی کوردستان؛ من بە پێویستی دەزانم پارتی و یەکێتی پێکەوە لەژێر هەر ناو دروشم و هاوپەیمانیەتیەکدا بێت، یەەەک بگرنەوە، بە ڕاستی هەر ئەوان دەتوانن ئایندەی هەرێمی کوردستان بپارێزن، بەڵام ئەوە نەبێ لە ڕێکەوتنە نیشتمانییەکەی یەکێتی و پارتیدا، لایەنەکانی دیکە پەراوێز بخەین؛ دەکرێت هەموو لایەنەکان فاکتەرێکی بەهێز بن لەو ڕێککەوتنەدا؛ ڕێککەوتنەکەیش سوودی هەبێت بۆ هەمووان و بەرژەوەندیی هەموو لایەنەکان ڕەچاو بکرێت، چ بەرژەوەندی حزبی بێت، چ سیاسی، بەڵام بە نەتیجە هەموو بەرژەوەندییەکان لە خزمەت بەرژەوەندیی هەموو گەلی کوردستاندا بێت؛ وای لێ نەهێت بەرژەوەندیی تاکە حزبێک پێچەوانەی بەرژەوەندیی باڵا بێت و زیان بە بەرژەوەندی باڵامان بگەینێت، بۆیە من لە ئاکامی ئەو پێشهات و ئەزموونەی کە تێمان پەڕاند، بەڕاستی غیابی ئەو ڕێککەوتنە هەبوو، جا سەبەبەکەی هەرچییەک بێت، یان چۆن کرا، پێم باشە کارا بکرێتەوە و بخرێتە کار، بە گیانێکی نوێوە لەگەڵ واقعی ئێستای هەرێمی کوردستاندا بگونجێت، دڵنیام لەوەی کە ئێمە دەتوانین ئایندەی خۆمان بەو ڕێککەوتنە بپارێزین، چونکە نەمانی ئەو ڕێککەوتنە زەرەرێکی زۆری بە هەرێمی کوردستان گەیاند".