سەرچاوەیەک لە هێزی پێشمەرگە بە رووداوی راگەیاند لە بەرزاییەکانی سوڵتان عەبدوڵڵا لە میحوەری گوێڕ-مەخموور نۆ چەکداری داعش خۆیان رادەستی هێزەکانی پێشمەرگە کردووە.

سەیفوڵڵا شەمسەددین، ملازمی یەکەم لە هێزی سێی بەتالیۆنی دووی سووپای بارزان راگەیاند : کاژێر شەشی بەرەبەیانی دووشەممە ٢٦ی تشرینی یەکەم نۆ چەکداری داعش خۆیان رادەستی هێزەکانی پێشمەرگە کرد".

ئەو سەرچاوەیە گوتیشی" ئەو چەکدارانە بە جلی مەدەنییەوە لە رووباردا پەڕیونەتەوە و توانیویانە خۆیان بگەیەننە سەنگەرەکانی پێشمەرگە".

بە گوتەی ئەو ئەفسەرەی هێزی پێشمەرگە، ئەو نۆ چەکدارەی داعش لێکۆڵینەوەیان لەگەڵدا دەکرێت و دواتر دۆسییەکەیان رەوانەی دادگا و وەزارەتی پێشمەرگە دەکرێت.

رۆژی هەینی رابردوو لەکاتێکدا دوو چەکداری دیکەی داعش خۆیان رادەستی هێزەکانی پێشمەرگە کرد، سیروان بارزانی، بەرپرسی میحوەری گوێڕ- مەخموور بە رووداوی راگەیاند "ئێستا زۆر کەس لەنێو چەکدارانی داعش باوەڕیان بەو گرووپە نەماوە"، ئاماژەی بۆ ئەوەش کرد " پێمان وایە ئەوان لەو سنوورە لاوازبوونە و ئومێدیان نەماوە بۆیە بەتایبەتی لەو مانگەدا جگە لەوان ژمارەیەکی زۆر کەس خۆیان رادەست کردووە".




رووداو