له‌ سنووری‌ ناحیه‌ی‌ گوێر چه‌ند چه‌كدارێكی‌ رێكخراوی‌ تیرۆریستی‌ داعش خۆیان راده‌ستی‌ هێزه‌كانی‌ پێشمه‌رگه‌ ده‌كه‌ن و سه‌رچاوه‌یه‌كیش له‌ فه‌رمانده‌یی سلێمانی‌ له‌و سنووره‌ باس له‌وه‌ ده‌كات كه‌ ئه‌و چه‌كدارانه‌ وتوویانه‌ له‌ داعش و كرده‌وه‌كانی‌ بێزار بوونه‌.

مقه‌ده‌م دیاری‌ عه‌بدوڵڵا، به‌رپرسی‌ به‌شی‌ جموجۆڵ له‌ فه‌رمانده‌یی‌ سلێمانی‌ له‌ میحوه‌ری‌ گوێر راگه‌یاند: سه‌رله‌به‌یانی‌ ئه‌مڕۆ سێشه‌ممه‌ 7 چه‌كداری‌ داعش خۆیان راده‌ستی‌ فه‌رمانده‌یی‌ پێشمه‌رگه‌ی‌ سلێمانی‌ كرد له‌ میحوه‌ری‌ گوێر له‌ گوندی‌ ساقیه‌".

وتیشی‌: "به‌پێی‌ قسه‌ی‌ خۆیان ده‌ڵێن ئێمه‌ له‌ داعش بێزارین و ئێوه‌ بمانكوژن باشتره‌ له‌وه‌ی‌ ئێمه‌ له‌ناو داعش ژیان به‌سه‌ر ببه‌ین".

ئه‌و فه‌رمانده‌یه‌ ئاماژه‌ی‌ به‌وه‌شكرد: "پێشتر ئێمه‌ ئاگاداری‌ هاتنی‌ ئه‌وان نه‌بووین، ئه‌و چه‌كدارانه‌ له‌وێ‌ هه‌ڵهاتوون و روویان كردووه‌ته‌ ئێره‌".

باسی‌ له‌وه‌شكرد: "سه‌رجه‌م چه‌كداره‌كان عه‌ره‌بن و خه‌ڵكی‌ ناحیه‌ی‌ نه‌مروودن".






خه‌ندان