چوار چەکداری داعش لە سنووری سوڵتان عەبدوڵڵا لە میحوەری گوێڕ خۆیان رادەستی هێزەکانی پێشمەرگە کرد.

موقەدەم عەبدوڵڵا فرامەرز مزووری، فەرماندەی بەتالیۆنی 2ی هێزی یەکی فەرماندەیی بارزان راگەیاند : بەیانی رۆژی شەممە 10/10/2015 ، چوار چەکداری داعش بە ناوەکانی: عەبدولرەزاق محەممەد عەبدوڵڵا، مەحموود محەممەد خەلەف، محەممەد سەعید حوسێن و حەسەن فەرەج خۆیان رادەستی هێزی پێشمەرگە کردووە".

بە گوتەی موقەدەم عەبدوڵڵا فرامەرز، ئەو چوار چەکدارەی داعش لێکۆڵینەوەیان لەگەڵ دەکرێت و دواتر دۆسییەکەیان رەوانەی دادگا و وەزارەتی پێشمەرگە دەکرێت.

یەکێک لە چەکدارە هەڵاتووەکانی داعش بە ناوی حەسەن فەرەج بۆ رووداو گوتی: "هەڵاتنی ئێمە لەبەردوو هۆکار بووە، یەکەمیان لە ترسی مردن، دووەم لەبەر برسییەتی".

ئەو چەکدارە هەڵاتووەی داعش گوتی "بێ متمانەییەکی زۆر لە نێو رێکخراوی داعش درووست بووە و گومان لەهەر چەکدارێکی خۆیان بکەن دەیکوژن"، گوتیشی "لە سەرەتای هاتنی داعشەوە لە مانگی حوزەیرانی 2014 ، ئێمە چەکمان بۆ ئەو رێکخراوە هەڵگرتووە".










رووداو