سەرۆكی فراكسیۆنی توركمان لە ئەنجومەنی پارێزگای هەولێر رایگەیاند، دوای ئەوەی بڕیاردرا لە شاری هەولێر مزگەوتێك بۆ توركمانەكان تەرخان بكرێت تا تێیدا بە زمانی توركمانی وتاری نوێژی هەینی پێشكەش بكرێت، دوای كۆبوونەوە و راوێژكردن، بڕیاردرا لقی یەكێتی زانایانی ئاینی توركمانیش لە هەرێمی كوردستان، بكرێتەوە.
عیماد رەفعەت سەرۆكی فراكسیۆنی توركمان لە ئەنجومەنی پارێزگای هەولێر بە خەندانی راگەیاند: "هەرچەندە یەكێتی زانایانی ئاینی هەرێمی كوردستان بۆ هەموانە بەبێ‌ جیاوازیی، بەڵام بەداخەوە نوێنەری توركمانی تێدا نەبووە و زانایانی ئاینی توركمانیش پەرتەوازەبوون و شوێنێك نەبوو تێیدا كۆببنەوە، بۆیە دوای چەندان كۆبوونەوە لە یەكێتی زانایانی ئاینی هەرێمی كوردستان بڕیاردرا، لقی هەولێر بۆ زانایانی ئاینی توركمان بكرێتەوە".
سەرۆكی فراكسیۆنی توركمان لە ئەنجومەنی پارێزگای هەولێر وتیشی: "دەوای ئەو بڕیارە، لەئێستادا نزیكەی 20 مامۆستای ئاینی توركمان لەو لقە كۆدەبنەوە و دواتریش مامۆستاكانی تر پەیوەندییان پێوە دەكەن و لەو لقە دەبنە ئەندام".
عیماد رەفعەت، ئامانجی كردنەوەی لقی زانایانی ئاینی توركمانی بۆ یەكسختن و كۆكردنەوەی ماماستایانی ئاینی توركمان گەڕاندنەوە و وتی:"لەو رێگەیەوە دەكرێت مامۆستایانی ئاینی توركمان لەژێر یەك چەتردا كۆبكرێنەوە تا بتوانن زیاتر خزمەت بە مەسەلەی ئاینی بكەن لە هەرێمی كوردستان بە گشتی و لە شاری هەوولێر بەتایبەت".
لەماوەی رابردوودا، بڕیاردا لە شاری هەولێر مزگەوتێك بۆ توركمانەكان تەرخان بكرێت تا لە رۆژی هەینیدا مامۆستایانی ئاینی ئەو پێكهاتەیە، بتوانن بەزمانی خۆیان، وتاری نوێژی هەینی پێشكەش بكەن.