ئەندامێکی مەکتەبی سیاسیی پارتی دیموکراتی کوردستان رایدەگەیەنێت، کە یەکگرتووی ئیسلامی کوردستان و یەکێتیی نیشتیمانیی کوردستان بە چارەسەریی مامناوەندی لەبارەی پرسی سەرۆکایەتیی هەرێمی کوردستانەوە، رازین.

مەحموود محەممەد، ئەندامی مەکتەبی سیاسیی پارتی بە رادیۆی دەنگی ئەمریکای راگەیاندووە، کە لە کۆبوونەوەی پێنج قۆڵیدا، پارتی سێ پێشنیازی داوەتە حزبەکان و دەخوازێت ئەوانیش ”بژاردەی دیکەیان هەبێت“.

بەپێی گوتەکانی مەحموود محەممەد، یەکگرتوو چارەسەری مامناوەندیی بۆ پرسی سەرۆکایەتیی هەرێمی کوردستان هەیە و یەکێتیش پێی باشە چارسەرێکی مامناوەندیی بۆ کێشەکە لەنێوان حزبە سیاسییەکانی کوردستان بدۆزرێتەوە.

هەروەها بەپێی هەواڵەکەی دەنگی ئەمریکا، محەممەد ئەحمەد، یاریدەدەری ئەمینداری گشتیی یەکگرتوو رایگەیاندووە، کە کۆمەڵی ئیسلامیی کوردستان و یەکێتی داوای دواخستنی کۆبوونەوەی پێنج قۆڵییان کردووە، کە بڕیاربوو رۆژی یەکشەممە 6ـی ئەیلول ئەنجامبدرێت و بۆ یەکشەممەی داهاتوو 13ـی ئەیلول دواخرا.

لە دانیشتنی رۆژی 23ـی حوزەیرانی 2015، پەرلەمانی کوردستان بە بێ ئامادەبوونی فراکسیۆنی زەرد، خوێندنەوەی یەکەمی بۆ پرۆژە یاسای چوار حزبەکە (یەکگرتوو، یەکێتی، کۆمەڵ و گۆڕان) کرد، کە بەپێی ئەو پرۆژە یاسایە، دەبێ سەرۆکی هەرێمی کوردستان لە پەرلەمان هەڵببژێردرێت و پارتیش داوادەکات، لە هەڵبژاردنی گشتیدا، خەڵک سەرۆکی هەرێمی کوردستان هەڵبژێرێت.












باسنیوز