سێ بەرپرسی داعش کوژران، کە گومان دەکرێت دەستیان لە رفاندنی کچ و منداڵانی کوردی ئێزدی و کۆمەڵکوژییەکەی گوندی کۆچۆ-ەوە هەبووبێت.

قاسم سمۆ، به‌ڕێوه‌به‌ری ئاسایشی قه‌زای شنگال به‌ تۆڕی میدیایی رووداو راگه‌یاند "له‌سه‌ر رێگای نێوان شنگال - تەلەعفه‌ر، له‌ ئه‌نجامی بۆدوومانی فڕۆكه‌ جه‌نگییه‌كانی هاوپه‌یمانان، هه‌ریه‌ك له‌ سالم مزری، ئه‌حمه‌د ئه‌لزوبێدی (ناسراو به‌ ئه‌بوسامی) والی ناحیه‌ بلێج، سامر حمود یاسین (ناسراو به‌ ئه‌بو ئه‌حمه‌د)، به‌رپرسی ئه‌منی ناحیەکە‌ و عه‌لی ئه‌لجبوری دادوه‌ری بلێج کوژران".

به‌ڕێوه‌به‌ری ئاسایشی شنگال ده‌ڵێت "دوو له‌و به‌رپرسانه‌ خه‌ڵكی ناحیه‌ی به‌عاج-ن و ئه‌وەی دیکەش خه‌ڵكی گوندی یاسین-ی سه‌ر به‌ ناحیه‌ ره‌بیعه‌یە‌، کە ئه‌نجامده‌رانی سه‌رەكی كۆمەڵكوژی گوندی كۆچۆ و‌ گرتن و بردنی كچان و ژنانی كوردی ئێزدی بوونە".

ماوه‌یه‌كه‌ فڕۆكه‌ جه‌نگییه‌كانی هاوپه‌یمانان، به‌رده‌وام به‌سه‌ختی بنکەکانی داعش لە ناوچه‌كانی شنگال و تەلەعفه‌ر بۆدوومان ده‌كه‌ن و به‌پێی زانیاریه‌كان‌ به‌ ده‌یان به‌رپرس و چه‌كداری داعش کوژراون.













رووداو