لە ماوەی یەک هەفتەدا ئەندامانی ئەنجومەنی سێ شار و ناحیەی ڕۆژهەڵاتی کوردستان بە کۆمەڵ نامەی دەست لە کار کێشانەوەی خۆیان بۆ دامودەزگا پەیوەندیدارە حکوومەتییەکان بەرز کردووەتەوە.

بەپێی هەواڵی هەواڵدەرییەکان، پاش ئەوەی پێنج کەس لە ئەندامانی ئەنجومەنی ناحیەی “شیناوێ” نامەیەکی دەست لە کار کێشانەوەیان واژۆ کرد و پێشکەش بە قایمقامی پیرانشاریان کرد، ئەندامانی ئەنجومەنی شارەکانی مەهاباد و شنۆش دەست لە کار کێشانەوەی خۆیان ڕاگەیاندووە.

چەند ڕۆژ لەمەوبەر پێنج ئەندامی ئەنجومەنی ناحیەی شیناوێ لە پیرانشار باسیان بەهۆی کەمتەرخەمیی ناوەندە پەیوەندیدارەکان بە نیسبەت خەڵکی ئەو ناحیە و نۆژەننەکردنەوەی قوتابخانەی شیناوێ دەست لە کار کێشانەوەی خۆیان راگەیاند.

هەر دوابەدوای ئەوان، ئەندامانی ئەنجومەنی شاری مەهابادیش بەهۆی کێشە و ناکۆکیی ناو ئەنجومەنەکە نامەی دەست لەکار کیشانەوەی خۆیان بۆ ناوەندە حکوومەتییەکان بەرز کردووەتەوە.

“کامران عەلیزادە ئازەر” و “سەید رەسووڵ نەبەوی” ئەو ئەندام ئەنجومەنانەی شاری مەهابادن کە بە گوتەی خۆیان بەهۆی کێشە و نادادپەروەرییەوە دەست لە کار کێشانەوەی خۆیان راگەیاندووە.

هەر لەو پیوەندییەدا سێ ئەندامی ئەنجومەنی شاری شنۆ بەهۆی کێشەیان لە گەڵ سەرۆکی ئەنجومەنەکە وازیان لە پۆستەکانیان هێناوە و دەستیان لە کار کێشاوەتەوە.

“عەلیڕەزا محەمەدنژاد، کازم ئیلاهی و رەشید ئیسفەندیاری” نامەی دەست لە کارکێشانەوەی خۆیان واژۆ کردوە و بۆ قایمقامی شارەکە بەرزیان کردووەتەوە.











باسنيوز