(فازڵ میرانی) سكرتێری مەكتەبی سیاسی لە دیمانەیەكیدا لەگەڵ كەناڵی (ئەلعەرەبییە)دا چەندین پرسی گرینگی لەبارەی بارودۆخی هەرێمی كوردستان و عێراقی
خستە ڕوو؛ بەتایبەتی لەبارەی كۆبوونەوە پێنجقۆڵییەكان لەبەر رۆشنایی پەیامەكەی (سەرۆك بارزانی) بۆ دەرچوون لەقەیرانی سیاسی و چەسپاندنی پڕەنسیپی تەوافوق لەناوەوەو دەرەوەی پەرلەمان، ئەمە جگە لە بارودۆخی باكووری كوردستان و ناكۆكیی نێوان توركیا و پەكەكە.
لەو دیدارەیدا (میرانی)دەربارەی بەرپابوونەوەی شەڕ لە نێوان تورکیا و پارتیی کرێکارانی کوردستان(پەکەکە)دا رایگەیاند، کەمتەرخەمن ئەوانەی پرۆسەی ئاشتی پەک دەخەن، کە هیوایەکی زۆری لە لای حکوومەت و گەلی کوردیش لە هەر چوار پارچەدا چاندبوو؛ پاساویش بۆ هیچ لایەکیش لە شەڕکەران نییە، چونکە ئێمە باجی ئامادەیی (بوونى) پەکەکە لەسەر خاکی هەرێمی کوردستان و، هەروەها بۆردوومانی فڕۆکە جەنگییەکانی تورکیا دەدەین."
(میرانی) گوتیشی، ئێمە هێشتا لەگەڵ عێراقین و وەک بەشێکیش لێی ماوینەتەوە، خۆوابەستەکردن بە وڵاتێکی دیکەوە، لە هەست بە خۆبەکەمزانیی ئینتیمای نیشتیمانییە، ئەمە لە کاتێکدایە کە پارتیی دیموکراتی کوردستان ڕۆڵی هەبووە لە قووڵکردنەوەی ئینتیمای نیشتیمانی بۆ عێراق. هەڵبەت ئەم پرسی بۆردوومانەیش زۆر ئاڵۆزە و پشتی بە رێككەوتنی نێوان حكوومەتی (سەددام) و توركیا بەستووە كاتێك رێگەیان بە سوپای توركیا داوە بە قووڵایی 16 كیلۆمەتر بێنە نێو خاكی هەرێمی كوردستان و دواتر بووە 7 كیلۆمەتر، ئێستا حكوومەتی عێراقیش ناتوانێ پەكەكە وەدەر بنێت و ناشتوانێت بۆردوومانی توركیا رابگرێت و به‌داخه‌وه‌ حكوومەتی دوای (سەددام)ـیش ئەو رێككەوتنەی هەموار نەكردەوە.
سکرتێری مەکتەبی سیاسیی پارتی گوتیشی کە، ئێمە دووچاری قەیرانگەلێک بووینەتەوە، قەیرانی شەری دژ بە داعش و هەروەها قەیرانی دارایی عێراق و، دۆخی سیاسیی عێراقیش كاری تێكردووین، شەر لە سووریا و هاوکات شەڕی نێوان تورکیا و پەکەکەش هەروا.
دەربارەی پرۆسەی سیاسییش لە هەرێمی کوردستان بە ڕەچاوگرتنی هەموو ئەو قەیرانانەی دووچاری بوونەتەوە، (فازل میرانی) دەڵێت، سەرۆکی هەرێم یان سەرۆکی دەوڵەت کاتێک ئیدارەی وەها پرۆسەیەکی سیاسی دەکات کە لەسەر بنەمای تەوافوق یان دیمۆکراتییەتی تەوافوقی بێ، پەنا بۆ گونجاوترین بژاردە دەبات ئەویش هەڵبژاردنی پێشوەختەیە، هەڵبەت ئەمەیش یاساییە.
هەرچی پێوەندییشی بە گۆڕانکاری لە سیستمی حوکم لە سەرۆکایەتییەوە بۆ پەرلەمانییە، (میرانی) گوتی، باوەڕمان وایە، بەشداریی ڕاستەوخۆی خەڵک لە هەڵبژاردنی سەرۆکەکەی گونجاوترین و ڕاستترینە، لەوەی کە لە لایەن ئەو پەرلەمانتارانەی بە هەر شێوەیەک بێ هەڵبژێردراون تا نوێنەرایەتیی خەڵک بکەن و، لە نێوان چوار دیوارەوە سەرۆک هەڵبژێرن.
دەربارەی سەرۆکایەتیی (سەرۆک بارزانی)ـیش لە ڕابەرایەتیکردنی وڵاتدا، ئێمە نکوڵی ناکەین لەوەی کەسانی دیکەی شیاو هەن بۆ سەرکردایەتیی ئەم وڵاتە، بەڵام زەرورەتی دۆخی هەنووکەیی ناوچەکە وا دەخوازێت کە، (سەرۆک بارزانی) کە کەسایەتیێکی لێهاتوو و پێگەیەکی بەهێزی لەسەر ئاستی هەرێمی و نیودەوڵەتی هەیە، وەک سەرۆک لە کارەکەی بەردەوام بێ، ئەگینا ئێمە خۆمان بەرەوڕووی دیکتاتۆری بووینەتەوە، ئەگەر ئەم شەڕە سەپێندراوە و قەیرانە نێوخۆییەکانی هەرێمی کوردستان و عێراق و پێویستی بە (سەرۆک بارزانی) نەبانایە، ئەوا حزبەکەیشی نەیدەویست بۆ ئەم دوو ساڵەیش هەر بە سەرۆک بمێنێتەوە؛ چونکە ئێمە حزبێکین لەگەڵ یاساداین و، دژ بە دیکتاتۆرییەت و خۆسەپێنین.
هاوکات ئەو دەنگۆیانەیشی رەتكردنەوە، كه گوایە كورد سوودی لە داگیركاریی داعش وەرگرتووە بۆ دەستبەسەرداگرتنی ئەو ناوچانەی ماددەی 140 دەیانگرێتەوە، ئەو گوتی، لە زۆر ناوچەی ئازادکراودا وک زوممارو رەبیعەو دەڤەری شنگال، هاووڵاتی کورد، عارەب و تورکمان و مەسیحی و لە رووی ئایینەوە موسوڵمان و ئێزدی و مەسیحی کۆی پێکهاتەکان پێکەوە دەژیێن.
گوتیشی، (سەرۆک بارزانی) داوای لە بەغدا کردووە تا بۆ بەپاریزگاکردنی شنگال ڕێوشوێنی پیویست بگرێتە بەر، ئەمەیش بە هۆی ئەو تایبەتمەندییەی کە شنگال هەیەتی و لەەبر ئەو هەموو ستەمەی لە خەڵکەکەی کراوە.. هەڵبەت شنگال لە ڕووی جیۆگرافیا و مێژوویشییەوە کوردستانە.
پێوەست بە پرسی سەربەخۆییشەوە (میرانی) دەڵێت، بەلەبەرچاوگرتنی یاساکانی نێودەوڵەتان و دۆخی بابەتی و خودی دەبێ هەنگاو بە ئاراستەی سەربەخۆیی بنێین، دەبێ بە میکانیزمی گونجاو و تێگەیشتنیش بێ لەگەڵ حکوومەتی ناوەندو، بە شێوەی ئاشتی و بە یاسا ئەم پرۆسەیە ساز بدرێ.
پێشتر دۆخی بابەتی هۆکار بوون لەوەی کورد نەگات بە بەدیهێنانی خەونی سەربەخۆیی، هەڵبەت دۆخی بابەتی زۆر لە دۆخە خودییەکە لەبارترە، چونکە باری سووریا کە هەر کەس دەیزانێ چۆنە هەروەها عێراقیش، بەڵام بە داخەوە ئەمجارە باری خودی بە ئاراستەی هێنانەدی ئەم ئامانجە نییە.