بەشی پێشبینی بەڕێوەبەرایەتی کەشناسی و بوومەلەرزەزانی هەرێمی کوردستان رایگەیاند" لە دووەم رۆژی جەژنی رەمەزاندا ئەگەری باران بارین هەیە".

بەڕێوەبەرایەتی کەشناسی و بوومەلەرزەزانی هەرێمی کوردستان پێشبینی گۆڕینی کەش و هەوا و پلەی گەرمی دەکات لە رۆژی شەممە 18-7-2015 و رادەگەیێنێت:" رۆژی شەممە دوای لاوازبوونی نزمە پاڵەپەستۆی وەرزی گەرمی، کاریگەری بەرزە پاڵەپەستۆی تورکیا کە بارستە هەوایەکی فێنک و شێداری لەگەڵدایە دەگاتە باشووری کوردستان، هاوکات سەنتەری پارێزگاکان ساماڵ دەبێت و ئەم کاریگەرییەش دەبێتە هۆی دابەزینی پلەکانی گەرما".

بەپێی پێشبینییەکانی ئەو بەڕێوەبەرایەتییە، لە ناوچە شاخاوییە سنوورییەکانی باکوور و باکووری رۆژهەڵاتی باشووری کوردستان ئاسمان نیمچە هەور دەبێت و ئەگەری بارینی باران هەیە بە شێوەی پچڕ پچڕ، ئەم بارودۆخەش تاوەکو 22-7-2015 بەردەوام دەبێت.

لە رۆژانی جەژندا پێشبینی کراوە کە رۆژی20-7-2015 نزمترین پلەی گەرمی تۆمار بکرێت، بەم شێوەیە.

هەولێر 38-39 پلە
سلێمانی 37-38 پلە
دهۆک 34-35 پلە
کەرکووک 40-41 پلە
هەڵەبجە 37-38 پلە