بەپێی هەواڵێکی ماڵپەڕی شەرقولئەوسەت، لە وتارێکدا لە پەیمانگای رۆژهەڵاتی نێوەڕاست لە واشنتنی پایتەختی ئەمریکا، هێمن هەورامی، ئەندامی سەرکردایەتی پارتی رایگەیاندووە، کە ”هەولێر هەوڵدەدات بەشێوەیەکی دۆستانە بەغدا تەڵاقبدات و ئەمەش دەبێتە هۆکارێکی ئارامیی ناوچەکە“.

هێمن هەورامی ئاماژەی بەوەکردووە، کە ”لە ماوەیەکی زۆر نزیکدا و رەنگە کەمتر لە دوو ساڵی دیکە بێت“ راپرسی بۆ سەربەخۆیی کوردستان ئەنجامدەدرێت.

ئەو ئەندامەی سەرکردایەتی پارتی پێیوایە مافی هەموو هاووڵاتییەکی باشووری کوردستانە بەشداریی لە پرسی سەربەخۆیی بکات و باسی لەوەشکردووە، کە بەغدا بۆ هەرێمی کوردستان گرنگە، ”بۆیە دەمانەوێ بە ئاشتی جیابینەوە و ئارامیی کوردستان و ناوچەکە زیاتر بکەین“.

هێمن هەورامی باسی ئەوەشی کردووە، کە حکوومەتی عەبادی وەفای بۆ رێککەوتنەکان نەبووە، بۆ ئەمەش، دەستبەسەرداگرتنی وەزارەتی بەرگری عێراقی لەلایەن شیعەکان، بڕیی بودجەی هەرێمی کوردستان و پرسی نەوتی بە نموونە هێناوەتەوە.

هەورامی لەبارەی پەیوەندی کورد و ئەمریکا گوتویەتی، ”ئەمریکا هاوپەیمانێکە ناتوانین دەستبەرداری ببین، هیچ هەنگاوێک بەبێ راوێژی واشنتن ئەنجامنادەین“.

















باسنیوز