لە دیدارێكی تایبەتدا بۆ گۆڤاری گوڵان مایكل جۆنستۆن تایبەتمەند و پسپۆڕ لەسەر پارتی سیاسی بۆ گوتى: یەكێك لە كێشە ڕاستەقینەكان كە ئێوە بە باشی و بە شێوەیەكی پەنهانی ئاماژەتان پێكرد، ئەوەیە زۆر فاكتەری دیكە هەن كە ڕەفتارەكانی حكومەت دادەڕێژن كە لە دەرەوەی كۆنتڕۆڵی پارتەكانن. من بیر لەو ڕێگایە دەكەمەوە كە هەر حكومەتێك دەیگرێتەبەر بۆ مامەڵەكردن لەگەڵ بازاڕی دارایی جیهانی و بازاڕی كاڵای جیهانی، ئەمەش سنووربەندی دەخاتەسەر كارەكانی حكومەت بە چاوپۆشین لەوەی ئایدیۆلۆژیای حكومەت چییە، یاخود ئایدیۆلۆژیای پارتە سیاسییەكان چین. ئەوەی ڕوودەدات یەكێكە لەو شتانە، چونكە پارتە سیاسییەكان دەتوانن كارا بن لە گرتنەبەری سیاسەتێكدا، یان بە هۆی ورووژاندنی ئابڕووچونێكەوە، یان بانگەشەی بوونی گەندەڵی بۆ كۆكردنەوەی پشتیوانی، یان پەنابردن بۆ ناسیۆنالیزم، یان دڵسۆزییەكانی نێو كۆمەڵگە، ئیتر ئایینی بێت، یان ئیتنی.

مایكل جۆنستۆن هەروەها گوتی: مشت و مڕێكی ڕاستەقینە لە باری پۆپۆلیزمەوە دەكرێت و هەندێ كەس ڕەشبینن لە ئاست كاریگەری پۆپۆلیزم لەسەر دیموكراسی، بەڵام ئەوەی پارتێكی سیاسی بەهێزی بنكە فراوان دەتوانێت بیكات، ئەوەیە تێڕوانین و بۆچوونێكی جیاوازی زۆر و بەرژەوەندیی جیاواز بهێنێتە ناو پرۆسەكەوە، بەڵام كاتێك پارتەكان بە باشی ڕێكنەخراون و بنكەفراوان نین، ئەوا لە زۆر حاڵەتەدا پۆپۆلیزم بەرەو نادیموكراسی بوون دەچێت.


لە پرسیارێكی گۆڤاری گوڵاندا كە ئایا بەهۆی تۆڕە كۆمەڵایەتییەكانەوە ئێستا خەڵكی دەستڕۆیشتووترن لە ڕووی هێنانەئارای گۆڕانكاری و دروستكردنی ناسەقامگیری جۆنستۆن گوتی: پێموایە ئەوە ڕاستە و میسر نمونەیەكە لەم ڕووەوە، كە بووە هۆی ناسەقامگیركردنی ڕژێمەكەی موبارەك، بەڵام كاتێك ڕژێمەكە ڕووخا، ئەوا پێكەوەنانەوەی شتێك كە بتوانێت حوكمڕانی بكات، كە نەك تەنها بتوانێت سەقامگیری، بەڵكو سەقامگیری دیموكراسی بەرهەم بهێنێت، بووە تەحەددییە ڕاستەقینەكە، ئەگەرچی پێدەچێت سەقامگیرییەك هەبێت، بەڵام دیموكراسیتر نیەی لەوەی ڕابردوو. حاڵەتی تونس زیاتر مایەی ئومێدە، ئەمە وەك شكاندنی هێلكە وایە كە بە ئاسانی دەشكێت، بەڵام ئاسان نییە بیخەیتە ناو توێكڵەكەیەوە.



مایكل لە كۆتایی قسەكانیدا گوتی: یەكێك لەو مەسەلانەی بنیادنەرانی دیموكراسی بە هەڵە لێی تێگەیشتوون بریتییە لە ململانێی سیاسی كە پێیانوابوو پارتە سیاسییەكان خۆیان لە خۆیاندا دیموكراسین، بەڵام كاتێك ئەمە حاڵەتەكە نەبوو و پارتە سیاسییەكان كارا نەبوون، ئەوا ئەوەی زیاتر ئەگەری ڕوودانی لێدەكرا، بریتی بوو لە ململانێی پارتە سیاسییەكان لەگەڵ یەكتردا لەسەر پرسی دەسەڵات و پۆستی سیاسی، نەك هەوڵبدەن خزمەت بە بەرژەوەندییەكانی خەڵك بكەن، هەر بۆیە ئەگەر پارتەكان لە نێو خۆیاندا گفتوگۆ لەبارەی سیاسەتەكانە بكەن، بۆ ئەوەی باشتر خزمەتی بەرژەوەندییەكانی خەڵك بكەن، ئەو كاتە دیموكراسی لە ئەنجامی ئەوەوە دروست دەبێت. زۆرێك لە توێژەران وەك دامەزراوەیەكی گشتی لە پارتە سیاسییەكان دەڕوانن كە دەبێت خزمەت بە دیموكراسی بكەن و گوزارشت لە خەڵك و پێداویستییەكانیان بكەن.


بۆ خوێندنەوەی ئەم بابەتە لە گۆڤاری گوڵان ژمارە(1033)