به‌ڕێوه‌به‌ری به‌ڕێوه‌به‌رایه‌تی كاروباری ئێزدییه‌كان له‌ پارێزگای دھۆك رایگه‌یاند كه‌ نووسینگه‌ی رزگاركردنی كچانی رفێندراوی ژێر ده‌ستی چه‌كدارانی رێكخراوی تیرۆریستی داعش تا ئێستا توانیویانه‌ ١٩٤٠ كه‌س رزگار بكه‌ن و ئه‌مڕۆش ٣١ كه‌سی تر گه‌یشتوونه‌ته‌ پارێزگای دھۆك.

ھادی دۆبانی، به‌ڕێوه‌به‌ری به‌ڕێوه‌به‌رایه‌تی كاروباری ئێزدییه‌كان له‌ پارێزگای دھۆك تایبه‌ت به‌ خه‌ندانی راگه‌یاند: "له‌ به‌رده‌وامی ھه‌وڵه‌كانی نووسینگه‌ی ھێنان و رزگاركردنی كچانی رفێندراوی ئێزدی له‌ ژێر ده‌ستی چه‌كدارانی رێكخراوی تیرۆریستی داعش ئه‌مڕۆ چه‌ند كه‌سێكی تر رزگاركراون".

ھادی دۆبانی وتی: "ئه‌مڕۆ سێشه‌ممه‌ ٣١ كه‌سی تر له‌ كچ و منداڵ و ژن له‌ ژێر ده‌ستی چه‌كدارانی رێكخراوی تیرۆریستی داعش رزگاركران".

وتیشی‌: "نووسینگه‌ی رزگاركردنی كچانی ئێزدی تا ئێستا توانیویانه‌ ١٩٤٠ كه‌س رزگار بكه‌ن و ھه‌ر ھه‌موویان گه‌یشتوونه‌ته‌ ناو كه‌س و كاره‌كانیان".

ئاماژه‌ی‌ به‌وه‌شكرد كه‌ "ئه‌و ٣١ كه‌سه‌ی‌ ئه‌مڕۆ رزگاركراون گه‌یشتوونه‌ته‌ پارێزگای دھۆك و ئێستا له‌ ناو كه‌سوكاره‌كانیان".