پەرلەمانتارێکی پارتیی دیموکراتی کوردستان ئاشکرای دەکات، حکوومەتی ھەرێمی کوردستان حکوومەتی عێراقی ئاگادار کردووەتەوە، مادامەکینێ بەغدا هەموو جارێ بوودجەی کوردستان دەقرتێنێت و هەقی کوردستان دەخوا، لەمەولا کوردستان نەوتی بۆ نانێرێت و، سەربەخۆ نەوتی خۆی دەفرۆشێت.

(نەجیبە نەجیب) ئەندامی پەرلەمانی عێراق لە فراکسیۆنی پارتیی دیموکراتی کوردستان بە ماڵپەڕی فەرمیی پارتیی دیموکراتی کوردستانی ڕاگەیاند: "جێگری سەرۆکوەزیرانی عێراق باسی لەوە کرد کە ھەرێمی کوردستان لە ١٣ـی مانگی ڕابردووەوە نەوتی خۆی ڕادەستی بەغدا نەکردووە و، ئاگاداری کردووینەتەوە مادامەکینێ بەغدا دەستی‌دەستیمان پێ دەکات و، چۆڕەچۆڕە بوودجە دەنێرێت و، هەقمان دەخوات، چیتر نەوت ناداتە بەغدا و، سەربەخۆ نەوتی خۆیان دەفرۆشن."

(نەجیبە نەجیب) گوتیشی: "بەغدا تەنها پارەی نەوتی ھەرێمی کوردستان ڕەوانە دەکات و، ئەوەی پارێزگای کەرکوک بەھی خۆی دەزانێت و، ھەژماری ناکات! بە حیسابی خۆیان هەر پارەی ئەو ٢٥٠هەزار بەرمیل نەوتەی نەوتەڵانەکانی هەولێر و دهۆک و سلێمانی دەنێرن!"