لێکۆڵینەوە لە بڕوانامەی مامۆستایانی ئایینی و کارمەندانی وەزارەتی ئەوقاف دەست پێ دەکات و بڕوانامەی ساختەی چەند کەسێک ئاشکرا دەکرێن. وەزیری ئەوقاف ڕای دەگەیەنێت، لەو پرۆسەیەدا چاوپۆشی لە ھیچ کەسێک ناکەن و بە یاسا مامەڵەیان لەگەڵدا دەکەن.

کەمال موسلیم، وەزیری ئەوقاف و کاروباری ئایینیی حکوومەتی ھەرێمی کوردستان ڕای گەیاند، دەستمان بە لێکۆڵینەوە کردووە لە بڕوانامەی مامۆستایانی ئایینی و کارمەندانی وەزارەتی ئەوقاف و گوتی: “لە ھەر شوێنێک و فەرمانگەیەک گومانمان ھەبێت، یان زانیاریمان پێ بدرێت، لێکۆڵینەوە لە ڕاستی و دروستیی بڕوانامەی مامۆستایانی ئایینی و کارمەندانی ئەوقاف دەکەین”.

ڕوونیشی کردەوە کە بڕوانامەی ساختەی ھەندێک مامۆستای ئایینی و کارمەندانی وەزارەتی ئەوقاف ئاشکرا بووونە، گوتیشی: “ھەر کات تەواو بووین، وردەکاریی ئەو پرۆسەیە ڕاناگەیەنین، بەڵام بڕوانامەی ساختەمان ئاشکرا کردووە.

کەمال موسلیم ئەوەی خستە ڕوو، کە ئەو مامۆستا ئایینی و کارمەندانانەی لە وڵاتانی تر بڕوانامەیان بەدەست ھێناوە، بڕوانامەکەیان دەنێردرێتە وەزارەتی خوێندنی باڵا بۆ وردبینی و پشتڕاستکردنەوەیان.
بەپێی دوایین ئامار، وەزارەتی ئەوقاف و کاروباری ئایینی ١٥ ھەزار و ٣٠١ فەرمانبەر و مامۆستای ئایینی و خزمەتگوزاری ھەیە.

وەزیری ئەوقاف جەختی کردەوە: “مامۆستای ئایینی بێت، یان ھەر کەسێک بڕوانامەی ساختەی ھەبێت، چاوپۆشیی لێ ناکرێت و بە یاسا مامەڵەی لەگەڵدا دەکرێت، ئەگەرچی حاڵەتەکە کەمە، بەڵام شتێکی نەشیاوە، مامۆستای ئایینی بیت و بڕوانامەی ساختەت ھەبێت”.

بەپێی یاسای سزاکانی عێراقی، ھەر کەسێک تۆمەتی بڕوانامەی ساختەی بەسەردا ساخ بێتەوە، زیندانی و غەرامەش دەکرێت.
مەلا ئەمیر گۆران، مامۆستای ئایینی لە شاری ھەولێر ڕاگەیاند: ساختەکاری ئەگەر بۆ کەسی ئاسایی جارێک ناشیرین بێت، ئەوا بۆ مامۆستایانی ئایینی شەرمەزاریی دونیا و قیامەتە”.

چاودێریی دارایی، وردبینی لە دۆسیەکانی بەڕێوەبەرایەتییەکانی ئەوقافدا دەکا، لە بەڕێوەبەرایەتیی ئەوقافی سلێمانی، نزیکەی ٢٠ بڕوانامەی ساختە ئاشکرا کراون و لە ئەوقافی ھەولێر و دھۆکیش لێکۆڵینەوە لە بڕوانامەکان دەستی پێ کردووە.

ھەر بەپێی زانیارییەکان، بەشێک لەو کارمەندانەی ئەوقاف کە بڕوانامەی ساختەیان لێ ئاشکرا بووە، بڕوانامەکانیان ئامادەیی بووە، بەڵام خۆیان تەنھا بڕوانامەی سەرەتاییان ھەیە.






















باسنیوز