د.یوسف محه‌مه‌د سادق، سه‌رۆكی په‌رله‌مانی كوردستان له‌ كۆبوونه‌وه‌ی له‌گه‌ڵ لیژنه‌ی ئاماده‌كردنی ده‌ستووری هه‌رێمی كوردستان، ده‌ڵێت ؛ ئه‌مڕۆ ئێوه‌ ئه‌ركێكی گه‌وره‌و مێژوویتان كه‌وتووه‌ته‌ سه‌رشان، هیوادارین هه‌موتان پێكه‌وه‌ به‌ گیانی سازانی نیشتمانییه‌وه‌ بتوانن ده‌ستوورێكی مۆدێرن و پێشكه‌وتوو بۆ هه‌رێمی كوردستان ئاماده‌ بكه‌ن. له‌ كۆبوونه‌وه‌یه‌كه‌دا، له‌گه‌ڵ لیژنه‌ی ئاماده‌كردنی ده‌ستووری هه‌رێمی كوردستان، كه‌ ئه‌مڕۆ له‌ په‌رله‌مانی كوردستان به‌ڕێوه‌چوو، هه‌ریه‌ك له‌ د.جه‌عفه‌ر ئیمینكی جێگری سه‌رۆكی په‌رله‌مان و فه‌خره‌دین قادر سكرتێری په‌رله‌مانی كوردستان ئاماده‌یبوون.

سه‌رۆكی په‌رله‌مان پیرۆزبایی له‌ ئه‌ندامانی لیژنه‌ی ئاماده‌كردنی ده‌ستووری هه‌رێمی كوردستان كرد و هیوای خواست ئه‌مڕۆ وه‌ك ده‌ستپێكێك بۆ كاره‌كانتان به‌رنامه‌ڕیژیی بۆ ئاماده‌كردنی ده‌ستووری هه‌رێمی كوردستان بكه‌ن، بۆ ئه‌وه‌ی له‌ ماوه‌ی دیاریكراودا بتوانین ڕاپرسی له‌سه‌ر بكه‌ین.

دواتر هه‌ریه‌ك له‌ جێگری سه‌رۆك و سكرتێری په‌رله‌مان، پیرۆزباییان له‌ ئه‌ندامانی ئاماده‌كاری ده‌ستوور كرد و سه‌رنج و تێبینی خۆیان له‌باره‌ی ئه‌و پرسه‌وه‌ خسته‌ ڕوو، پاشان ئه‌ندامانی لیژنه‌ی ئاماده‌كردنی ده‌ستوور دوای خۆناسین و یه‌كتر ناسین وه‌ك یه‌كه‌م هه‌نگاو ده‌ستیان به‌ یه‌كه‌مین كۆبوونه‌وه‌ی ئاماده‌كردنی ده‌ستووری هه‌رێمی كوردستان كرد.