حكوومەتی هەرێم: لەگەڵ ئەوە نین هێزی چەكداری دەرەوەی هەرێم لەسەر سنوورەكانمان بێ
(د. دیندار زیباری) یاریدەدەری بەرپرسی پەیوەندییەكانی دەرەوەی حكوومەتی هەرێمی كوردستان بە ماڵپەری فەرمی پارتی دیموكراتی كوردستانی ڕاگەیاند: یاسا و ڕێسا نێودەوڵەتییەكان ڕێگە نادات هێزی تر لە نێو خاكی وڵاتێكی دیکەدا هیچ جموجۆلێكی سەربازی بكا.
(د. دیندار زیباری) گوتیشی: "لە هێزەکانی سەر بە وەزارەتی پێشمەرگە و حكوومەتی هەرێمی كوردستان بترازێ، نابێت هیچ هێزێكی چەكدار لە سنووری هەرێمی كوردستاندا هەبێت."
یاریدەدەری بەرپرسی پەیوەندییەكانی دەرەوەی حكومەتی هەرێمی كوردستان ئاماژەی بەوەیش دا: "ئەگەر جموجۆڵی سەربازی ڕێگەی پێ نەدرێت چۆن ڕێگە بە شەڕ و پێكدادان دەدرێت، هەڵوێستی حكوومەتی هەرێمی كوردستان ئاشكرایە دژی ئەو جۆرە كارانەیە و لەگەڵ ئەوە نییە هێزی چەكداری دەرەوەی حكوومەتی هەرێمی كوردستان لەسەر سنورەكانمان بێت."
زێباری جەخت دەكاتەوە ڕێگە نادەن خاكی هەرێمی كوردستان دژی هیچ وڵاتێكی درواسێ بەكار بێت.
