سكرتێری پەرلەمانی كوردستان دەڵێت، بڕیارە سبەی جارێكی دیكە لەبارەی پێكهێنانی لیژنەی ئامادەكردنی دەستوورەوە كۆ ببنەوە و، هەوڵی جیددی دەدەن یەكلای بكەنەوە، چونكە تەنیا یەك خاڵی جیاواز هەیە و هەمووی یەكلا بووەتەوە.

سكرتێری پەرلەمانی كوردستان (فەخرەددین قادر) بە ماڵپەری فەرمیی پارتیی دیموكراتی كوردستانی راگەیاند: "بڕیارە سبەی سەرۆكایەتیی پەرلەمان و فڕاكسیۆنەكان جارێكی دیكە لەبارەی پێكهێنانی لیژنەی ئامادەكردنی دەستوورەوە كۆ ببنەوە بۆ ئەوەی بتوانن ئەو پرسە یەكلا بكەنەوە و كۆتایی پێ بێت".

(فەخرەددین قادر) گوتیشی: "هەنگاوی زۆر باش بۆ پێكهێنانی ئەو لیژنەیە نراوە و لە ئێستادا تەنیا یەك خاڵی جیاواز ماوە ئەویش ئەو فڕاكسیۆنانەن كە یەك كورسییان هەیە و چۆن لەو لیژنەیەدا بەشدار بن، لە لیژنەكەیشدا پارتی حەوت كورسی، گۆڕان پێنج، یەكێتی چوار، یەكگرتوو دوو، كۆمەڵی ئیسلامی یەك و مەسیحی و توركمان هەر یەكەیان كورسییەكیان بەر دەكەوێت، لە ئێستایشدا ئەوانەی یەك كورسییان هەیە، هەوڵ دەدەین سبەی ئەوەیش یەكلا بكەینەوە و میكانیزمیكی دادپەوەرانە بۆ ئەو پرسە بدۆزینەوە".