ئەمڕۆ چوارشەممە 29ـی 4ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ڕیچارد باڕۆنز سوپاسالاری بریتانیا و شاندێكی یاوەری كرد كە پێكهاتبوون لە ئەنگۆس مكی كۆنسولی بریتانیا لە هەولێر و ژمارەیەك ئەفسەر و ڕاوێژكاری سوپای بریتانیا.

لە دیدارەكەدا بارودۆخی سیاسی و ئەمنیی عێراق و هەروەها بارودۆخی مەیدانیی بەرەكانی ڕووبەڕووبوونەوەی تیرۆریستان تاوتوێ كرا، بیروڕایش سەبارەت بە پڕۆسەی ئازادكردنی موسل و قۆناغی دوای ئازادكردنی موسل و ئامادەكارییەكانی هێزەكانی عێراقی بۆ ئازادكردنی ناوچەكانی ژێر دەستەڵاتی داعش ئاڵوگۆڕ كرا.

هەر لەم كۆبوونەوەیەدا شاندی میوان ستاییشی ڕۆڵی سەرۆك بارزانی و هێزی پێشمەرگەی كوردستانیان كرد لە شكستدانی تیرۆریستان و ئاستی هەماهەنگیی نێوان هێزی پێشمەرگە و هێزی هاوپەیمانان و پڕۆسەی مەشق و ڕاهێنانی پێشمەرگە بە نموونەیی وەسف كرد.

لە بەشێكی دیكەی ئەم كۆبوونەوەیەدا سوپاسالاری بریتانیا پشتیوانیی وڵاتەكەی بۆ هەرێمی كوردستان و هێزی پێشمەرگە لە هەموو قۆناغ و دۆخێكدا دووپات كردەوە.