چوارشەممە 22ـی 4ـی 2015 بەڕێز مەسعود بارزانی سەرۆكی هەرێمی كوردستان، بە مەبەستی ئاگاداربوون لە كێشە و چۆنێتی ژیانی توركمانە ئاوارەكانی دەڤەرەكە و هەروەها تاوتوێكردنی هەڕەشەكانی داعش لەم دەڤەرە و ئاییندەی پێكەوەژیانی پێكهاتەكان لە گەڵ ژمارەیەك لە كەسایەتی و پیاوماقووڵانی توركمانی تەلەعفەر و ئاڤگەنێ و عەیازییە كۆبوویەوە.

سەرۆك بارزانی لە گوتەیەكدا ئاماژەی بە پەلاماری دڕندانەی داعش بۆ سەر پێكهاتەكانی ناوچەكە و ئاسەوارە خراپەكانی دەركەوتنی داعش كرد، كە وەك كارەساتێك بوو بۆ پێكهاتەكانی ناوچەكە و ئاماژەیشی بە خۆڕاگریی گەلی كوردستان و قارەمانێتیی پێشمەرگە دا كە تیرۆریستان لە سەر دەستی پێشمەرگە تووشی شكست هاتن و ناوچەیەكی بەرفراوان لەدەستی تیرۆریستان ڕزگار كرا. سەرۆك بارزانی ئامادەبووانی كۆبوونەوەكی لەوە دڵنیا كردەوە كە سەرجەم ناوچەكان لەدەستی داعش ڕزگار دەكرێت و خەڵك دەگەڕێنەوە دەڤەرەكانی خۆیان و، مانەوەی داعش تەنها مەسەلەی كاتە و نەمانیان حەتمیە و هیچ ئایندەیەكیان لەم ناوچەیەدا نییە. سەبارەت بە قۆناغی دوای داعش بە ئامادەبوانی ڕاگەیاند، پاش نەمانی داعش ئەوانەی بڕوایان بە پێكەوەژیان هەبێت و دژی داعش بن ئامادەین هاوكارییان بكەین و، لاپەڕەیەكی نوێی پێكەوەژیان و ژیانێكی نوێ دەست پێ بكەینەوە بەڵام ئەوانەی هاوكاریی داعشیان كردووە هیچ شوێنێكیان لە دەڤەرەكە نابێت و هەمان چارەنووسی داعشیان دەبێت. هاوكات سه‌رۆكى هه‌رێمى كوردستان ڕاشیگه‌یاند كه‌ چاره‌سه‌رى ڕیشه‌یى كێشه‌كان ئه‌وه‌یه‌ كه‌ ئێوه‌ بگه‌ڕێنه‌وه‌ ناوچه‌كانى خۆتان و ژیانێكى شه‌ره‌فمه‌ندانه‌ به‌سه‌ربه‌رن و له‌م ڕووه‌شه‌وه‌ ڕایگه‌یاند كه‌ په‌نابه‌خوا ته‌واوى ناوچه‌كان ئازاد ده‌كرێت له‌ ژێر كۆنتڕۆڵى داعش و كۆتایى ته‌واوه‌تى به‌ داعش ده‌هێنرێت.

لە بەرامبەردا ئامادەبووانی كۆبوونەوەكە سوپاسی سەرۆك بارزانی و پێشمەرگەیان كرد و، ئاماژەیان بە ڕۆڵی گرنگی بەڕێزیان و پێشمەرگە دا لە ئازادكردنەوەی ناوچەكانیان و، سوپاسی خەڵكی كوردستانیشیان كرد كە باوەشیان بۆ هەموو ئاوارەكان كردووەتەوە و خزمەتیان دەكەن، سەرەخۆشیشیان لە كەسوكار و خانەوادەی ئەو پێشمەرگە قارەمانانە كرد كە لە شەڕی دژی داعش بۆ پاراستنی پێكهاتە نەتەوەیی و ئایینییەكانی ناوچەكە گیانی خۆیان فیدا كردووە و خزمەتی مرۆڤایەتییان كردووە. هەروەها ئامادەیی خۆیشیان دەربڕی لە ژێر چەتری وەزارەتی پێشمەرگەدا شەڕی داعش بكەن.