یەکەم هەنگاوی دوای پەسەندکردنی یاسای ئامادەکردنی دەستووری کوردستان بۆ راپرسی، دروستکردنی ئەو لیژنە ٢١ کەسییەیە کە دەبێت لە ماوەی سێ مانگدا پرۆژەی دەستوور ئامادە بکەن و بیدەنە پەرلەمان، هەر لە ئێستاوە فراکسیۆنەکان خەریکی ئەوەن میکانیزمەکانی دیاریکردنی ئەندامانی ئەو لیژنەیە دابنێن، فراکسیۆنی پارتی پرۆژەیەکی بۆ ئەوە هەیە.

ئەندامانی ئەو لیژنەیە لەپەرلەمان و لەدەرەوەی پەرلەمانیش دەبن، بەڵام بە مەرجێک خەڵکی شارەزا بن و خاوەن ئەزموون بن. پێشنیازێک هەبوو کە لایەنە سیاسییەکانیش نوێنەریان لە لیژنەکە هەبێت، بەڵام ئەوە رەتکرایەوە، بەڵام سەرۆکی فراکسیۆنی کۆمەڵی ئیسلامی دەڵێت، دواجار هەر وای لێدێت و دیاریکردنی ئەندامانی لیژنەکە بە ئیستحقاقی هەڵبژاردن دیاریدەکرێن.

هەرچەندە بڕیاردان لە لیژنەکەدا بە سازان دەبێت، بەڵام لە ئێستاوە لایەنەکان دەیانەوێت، زۆرینەی ئەندامانی لیژنەکە ئەوانە بن دەستوور بەدڵی ئەوان بنووسنەوە. فراکسیۆنی گۆڕانیش دەڵێن ئەوە مافێکی ئاسایی هێزە سیاسییەکانە.

دروستکردنی لیژنەکە دەکەوێتە دوای پەسەندکردنی یاسای ئامادەکردنی دەستوور بۆ راپرسی، دوای دروستبوونیان دەبێت لەماوەی ٩٠ رۆژدا پرۆژەی دەستوور ئامادە بکەن، گەر نەیانتوانی پەرلەمان ماوەکەیان بۆ درێژدەکاتەوە.



روداو