وەزارەتی ئەوقافی حكومەتی هەرێمی كوردستان، رونكردنەوەیەكی لەبارەی گواستنەوەی خوێندنگا ئایینیەكان بۆ سەر وەزارەتەكانی پەروەردەو خوێندنی باڵا بڵاوكردەوە.

لە ڕوونكردنەوەكەشدا ئاماژە بۆ ئەوە كراوە، دەركردنی بڕیارەكە بە دیراسەیەكی قوڵ و گفتوگۆیەكی فراوان و هەمەلایەنەی وەزارەتەكانی ئەوقاف و پەروەردە و خوێندنی باڵا و توێژینەوەی زانستی و ناوخۆ و رۆشنبیری و لاوان و راوێژكاری سەرۆكی هەرێمی كوردستان بۆ كاروباری ئاینی و سەرۆكایەتی ئەنجومەنی وەزیران بووە.

ئەمەش دەقی رونكردنەوەكەیە

رونكردنەوەیەك لەوەزارەتی ئەوقاف و كاروباری ئاینی حكومەتی هەرێمی كوردستانەوە

بڕیاری گواستنەوەی قوتابخانە و خوێندنگە و پەیمانگا ئیسلامیەكانی سەر بەوەزارەتی ئەوقاف بۆ سەر وەزارەتەكانی پەروەردە و خوێندنی باڵا "دوای دیراسەیەكی قوڵ و گفتوگۆیەكی فراوان و هەمەلایەنەی وەزارەتەكانی ئەوقاف و پەروەردە و خوێندنی باڵا و توێژینەوەی زانستی و ناوخۆ و رۆشنبیری و لاوان و راوێژكاری سەرۆكی هەرێمی كوردستان بۆ كاروباری ئاینی و سەرۆكایەتی ئەنجومەنی وەزیران و چەندین كەس و لایەنی شارەزای بواری ئیسلامی بووە و لەبەرژەوەندی گشتی خوێندنی ئیسلامی و مامۆستا و قوتابی و خوێندكارانی قوتابخانە و پەیمانگا ئیسلامیەكانی كوردستانە و بەپێویستی دەزانین سوودەكانی ئەم بڕیارە بەم چەند خاڵە كورت بكەینەوە:

1- قوتابی و خوێنكارانی قوتابخانە و پەیمانگە ئیسلامیەكان لەپاڵ وانە ئیسلامی و فیقهیەكاندا"وانەی زانستی و مرۆیی زیاتر دەخوێنن كە شارەزایی زیاتریان لەبوارە جیاجیاكاندا پێدەبەخشێ.

2- هەلی درێژەدان بەخوێندنی باڵا و قبوڵكردنی زیاتریان لەكۆلیژ و پەیمانگەكانی كوردستان و هەژماركردنی بڕوانامەكانیان لەسەرجەم دامودەزگاكانی حكومەتی هەرێم بۆ فەراهەم دەكات.

3- مامۆستایانی پەیمانگە و قوتابخانە ئیسلامیەكان هەمان ئیمتیازاتی مادی و مەعنەوی مامۆستاكانی وەزارەتەكانی پەروەردە و خوێندنی باڵایان دەبێت .

4- سیستمی خوێندنی ئیسلامی باشتر یەكدەخرێت و رێكدەخرێتەوە و كۆتایی بەو فرە تەفسیر و شیكردنەوەی دەق و فەرمودانە دێت كە لەوانەكاندا هەبوو "وەهەندێ جار دەبووە هۆی شپرزەكردنی قوتابیان لەڕوی فیكریەوە. "

5- وەزارەتی ئەوقاف دوای ئەم بڕیارە زیاتر دەستكراوە دەبێت بۆ گرنگیدان بەحوجرەكان و پێگەیاندن و ئامادەكردنی وتارخوێن و پێشنوێژی شارەزا و لێهاتوو بۆ مزگەوتەكانی كوردستان و باشتر دەیپەردەژێتە سەر رێكخستنەوە و باشتر بەكارهێنانی وەقفەكان و سیستمی حەج و عومرە و پێكەوەژیانی ئاینی و پرۆژە جۆراوجۆرەكانی دیكەی وەزارەت

خەندان