له‌دیدارێكدا له‌گه‌ڵ نه‌وزاد هادى پارێزگارى هه‌ولێر شاندێكى باڵاى كۆمسێونى كاروبارى په‌نابه‌رانى سه‌ر به‌نه‌ته‌وه‌ یه‌كگرتووه‌كان كه‌ پێكهاتبوون له‌، ڤۆلگه‌ر تارك یاریده‌ده‌رى ئه‌میندارى گشتى له‌ كۆمسێونى باڵاى په‌نابه‌ران و، نیل رایت ، نوێنه‌رى كۆمسێونى باڵاى په‌نابه‌ران له‌عێراق و ، ئیمانوئێل گانیك، نوێنه‌رى كۆمیسیونه‌كه‌ له‌ هه‌رێمى كوردستان، ستايشى رۆلى مرۆیانه‌ و به‌ ده‌نگه‌وه‌ هاتن و كۆمه‌ك و هاوكاریه‌كانى گه‌ل و حكومه‌تى هه‌رێمى كوردستانیان كرد بۆ له‌ خۆگرتن و داڵده‌دان و حه‌واندنه‌وه‌ى پتر له‌ دوو ملیون ئاواره‌و په‌نابه‌ران له‌ هه‌رێمى كوردستان، كه‌ چ له‌ رێگه‌ى پارێزگاكان و چ له‌ رێگه‌ى كۆمه‌كى میللى و جه‌ماوه‌رى و چ له‌ رێگه‌ى ده‌زگاو دامه‌زراوه‌و خێرخوازیه‌كانه‌وه‌ خزمه‌تى ئاواره‌و په‌نابه‌رانیان كردووه‌ به‌شێكى زۆرى مه‌ینه‌تى و خه‌مه‌كانیان له‌ ئه‌ستۆ گرتووه‌ تاراده‌یه‌ك ره‌وشى ژیان و گوزه‌رانیان له‌باره‌، كه‌ ئه‌ویش بۆ نه‌ته‌وه‌ یه‌كگرتووه‌كان و كۆمه‌ڵگه‌ى نێو ده‌وڵه‌تى مایه‌ى رێز و پێزانیینه‌.

له‌دواى به‌سه‌ر كردنه‌وه‌ى مه‌یدانیشیان بۆ كه‌مپه‌كانى ده‌وروبه‌رى هه‌ولێر و ئاشنابوونى له‌ نزیكه‌وه‌ى ره‌وشى ژیان و گوزه‌رانی ئاواره‌و په‌نابه‌ران، وه‌ هه‌روه‌ها ستایشى رۆلى پارێزگاو ئه‌و هه‌ماهه‌نگیه‌ ئه‌رێنیانه‌یان كرد له‌گه‌ل ستافه‌كانى نه‌ته‌وه‌یه‌كگرتووه‌كان و تێكراى ئاژانس و رێكخراوه‌ نێو نه‌ته‌وه‌یه‌كان، كه‌ بۆته‌ مایه‌ى پێشوه‌چونى ره‌وشى ئاواره‌كان و باشتر بوونى گوزه‌رانیان و فه‌راهه‌مكردنى زۆربه‌ى هه‌ره‌زۆرى پێداویستى و خزمه‌تگوزاریه‌ پێویستیه‌كانیان.

هه‌روه‌ها جه‌ختیشیان له‌ پێویسبوونى كاراتر كردنى هه‌ماهه‌نگى و ڕۆلى حكومه‌تى فیدرالى له‌م بواره‌دا كرده‌وه‌ به‌تایبه‌تیش كه‌هه‌رێمى كوردستان دووچارى قه‌یران و كه‌مى بودجه‌و فشارێكى ئابورى بۆته‌وه‌و ئاسته‌نگى زۆرى له‌پێشدایه‌.

به‌تایبه‌تیش له‌ به‌ره‌نگاربوونه‌وه‌ى داعش و شه‌ڕى تیرۆر كه‌ مه‌ترسیه‌كى گه‌وره‌یه‌ بۆ سه‌ر ئاسایشى جیهانى و بۆته‌ مایه‌ى ترس و تۆقان بۆ سه‌ر خه‌ڵكى سڤیل.