لە بابەتێكی تایبەتدا بۆ گۆڤاری گوڵان كەمال موسلیم وەزیری ئەوقاف و كاروباری ئایینی بۆ گوتى: ئەم شەڕەی دەوڵەتی بە ناو ئیسلامی داعش بە ناوی پیرۆزی ئیسلامەوە دژ بە نەتەوەكەمان دەكرێت و گەلی كوردستانی رووبەڕووی كۆمەڵكوژی كردۆتەوە، بەڵام ئەو تاوانانەی كە داعش لە ناوچەكانی ژێر دەسەڵاتی خۆی و دەرهەق بە گەلی كوردستان ئەنجامی دەدات، هیچ پەیوەندیەكی بە ئایینی پیرۆزی ئیسلامەوە نییە و گوزارشت لە پەیامی راستەقینەی ئایینی پیرۆزی ئیسلام ناكات، لەم روانگەیەوە وەزارەتی ئەوقاف بە هەموو دەزگاكانی، بەتایبەتی لە مینبەری مزگەوتەكانەوە لەلایەن مامۆستایانی ئایینی هەر لە سەرەتای شەڕی داسەپاوی داعش بەسەر كوردستان رووی راستەقینەی ئەم گرووپە تیرۆریستە چەكدارەیان بۆ هاووڵاتیان و هێزی پێشمەرگەی كوردستان ئاشكرا كردووە و بەتوندی رووبەڕووی ئەم فیكرە توندوتیژی و ئیرهابییە بووینەوە.

كەمال موسلیم هەروەها گوتی: بوونی مزگەوت و دێر و كەنیسە و پەرستگاكان لە كوردستان بەڵگەیەكی روونە بۆ ئەو پێكەوەژیانە ئاشتییانەی كە لە دێرزەمانەوە لە كوردستان هەیە، ئەمەش مێژوویەكی دوور و درێژ و رەگێكی قووڵی هەیە، بە رادەیەك ئەم پێكەوەژیانەی نێوان ئایین و ئایینزاكان بووەتە كەلتووری خەڵكی كوردستان و زادەی ئەمڕۆ و رووداوەكان نییە، بۆیە وەزارەتی ئەوقاف زیاتر پەرە بەم پێكەوەژیانە دەدات و پەیوەندی نێوان پەیڕەوانی ئایینی و ئایینزاكانی كوردستانیش زۆر باشە و هیچ كێشەیەك لەنێوانیاندا نییە، لەوەزارەتی ئەوقافیش بەڕێوەبەرایەتی گشتی كاروباری مەسیحییەكان و بەڕێوەبەرایەتی گشتی ئێزیدییەكان هەیە كە كارەكانی ئەم دوو پێكهاتەیە رادەپەڕێنن.

شايانى باسه موسلیم هەروەها گوتی: مینبەری مزگەوتەكان موڵكی هیچ كەس و لایەنێك نییە و نابێ لە بەرژەوەندی، یان لە دژی هیچ كەس و لایەنێك بەكار بێت، ئەم بابەتەش بەردەوام جەختی لەسەر دەكرێتەوە، هەر وتارێكیش سووكایەتی، یان دژایەتی هەر لایەن و پێكهاتەیەك بكات، یان سووكایەتی و ناوزڕاندنی تێدا بێت، وتاربێژەكە بەپێی یاسا رووبەڕووی لێپێچینەوە دەكات.


لە كۆتایی قسەكانیدا كەمال گوتی: من لەگەڵ ئەوەدام واباشترە كە مامۆستای ئایینی بێلایەن بێت، بەڵام لای ئێمە گرنگ نییە ئینتمای بۆ چ حزب و لایەنێكی سیاسی هەیە، گرنگ ئەوەیە نابێت ئەو ئینتمایەی لە كارەكانی و وتارەكانیدا رەنگ بداتەوە، پێگە و مینبەری مزگەوت نابێت بۆ بەرژەوەندی حزبەكەی دژی لایەنەكانی دیكە بەكار بهێنێت.

بۆ خوێندنەوەی ئەم بابەتە لە گۆڤاری گوڵان ژمارە(1021)