سەرۆكی هەرێمی كوردستان پێشوازی لە جێگری سەرۆك كۆماری عێراق دەكات
لە دیدارێكدا كە فواد حوسێن سەرۆكی دیوانی سەرۆكایەتیی هەرێمی كوردستان ئامادەی بوو، باس لە بارودۆخی سیاسی و ئەمنیی عێراق و بارودۆخی مەیدانیی شەڕی دژی تیرۆریستانی داعش كرا. هەروەها بارودۆخی شاری موسڵ و ژیان و گوزەرانی دانیشتوانی موسڵ و چۆنییەتی مامەڵەكردن لەگەڵ دۆخی هەنووكەیی و ڕزگاركردن و ئایندەی ناوچەكانی ژێر دەستی تیرۆریستانی داعش تاوتوێ كرا.
هەر لەم كۆبوونەوەیەدا جەخت لەوە كرایەوە كە لایەنە سیاسییەكانی عێراق هاوكار و هەماهەنگ بن لە شەڕی تیرۆریستان و ئەو شكستانەی بەسەر تیرۆریستاندا هاتووە سەرەتایەك بێت بۆ ڕزگاربونی هەموو شوێنەكان لەژێر دەستی تیرۆریستانی داعش.
لە بەشێكی دیكەی ئەم دیدارە جێگری سەرۆك كۆماری عێراق دەستخۆشی لە سەرۆك بارزانی و هێزی پێشمەرگە كرد بۆ ئەو سەركەوتنانەی لە بەرانبەر تیرۆریستانی داعش بەدەست هاتوون و هیوایشی خواست تیرۆریستان لە موسڵ و شوێنەكانی دیكەیش تووشی شكست بێن و ناوچەكان لە چنگی تیرۆریستان ڕزگار ببن.
