سەرۆکایەتی ھەرێم رونکردنەوە لەسەر کردنەوەی جەژنی نەورۆز دەدات
دەنگۆیەک لە نێو خەڵکدا بڵاو بۆتەوە کەوا بۆ نەورۆزی ئەمساڵ بڕیارێکی سەرۆکی ھەرێمی کوردستان ھەیە کەوا بەھیچ جۆرێک نەورۆز نەکرێتەوە و خەڵک نەرۆنە دەرەوەی شارەکان.
بەپێی ئەو دەنگۆیە ھۆکاری ئەو بڕیارە بۆ ئەوەیە شارەکان چۆل نەکرێن بۆ ئەوەی داعش و ئاوارە عەرەبەکان سوود لەم بارودۆخە وەرنەگرن.
حاکم ئازاد مەلا فەندی راوێژکاری یاسایی سەرۆکی ھەرێمی کوردستان ئەو دەنگۆیانەی رەتکردەوە و رایگەیاند : لە لایەن سەرۆکی ھەرێم و سەرۆکایەتی ھەرێمی کوردستان ھیچ بڕیارێک بۆ چۆنیەتی ئاھەنگی نەورۆز و چوونە دەرەوەی خەڵک بەم بۆنەیەوە نەدراوە.
حاکم ئازاد مەلا فەندی ئاشکراشیکرد، چۆنیەتی دیاریکردنی پێشووی جەژنی نەورۆز و یادکردنەوەی ئەو جەژنە دەوەستێتە سەر بڕیاری سەرۆکایەتی ئەنجومەنی وەزیران، گوتیشی: نەمبیستووە ھیچ بڕیارێک ھەبێت بۆ ئەوەی رێگری لە خەڵک بکرێت بۆ نەورۆزکردن نەکەن.
ساڵانی پێشوو لە ھەرێمی کوردستان بە بۆنەی جەژنی نەورۆز ٣ رۆژ بۆ ھەفتەیەک دەکرایە پشووی فەرمی و خەڵکیش بۆ سەیران و نەورۆز دەرۆیشتنە دەروەوەی شارەکان و سەیرانگاکان.
باسنیوز
