فەرماندەی پێشمەرگە لە میحوەری خازر موقەدەم (جادر زراری) دەڵێت، دوای ئەوەی لە سێ ڕۆژی رابردوودا زیاتر لە 40 ترۆریستی داعش لەو میحوەرە لەلایەن هێزەكانی پێشمەرگەوە كوژران و ژمارەیەكی زۆریش بریندار بوون، ئێستا داعش لە ناوچەكە لە جووڵە كەوتوون و توانای هێرشبردنیان نەماوە و خەریكی لێدانی خەندەقن بۆ ئەوەی لەبەر هێرشەكانی پێشمەرگە بەرگری لە خۆیان بكەن.

فەرماندەی پێشمەرگە لە میحوەری خازر موقەدەم (جادر زراری) بۆ ماڵپەڕی فەرمیی پارتیی دیموكراتی كوردستان گوتی، لە چیای زەرتك و حەسەن شام هێزەكانی پێشمەرگە ورەیان بەرزە و بۆ هەر رووبەڕووبوونەوەیەك لەگەڵ تیرۆریستانی داعش لە ئامادەباشیی تەواودان.

گوتیشی، "دوای ئەوەی لە سێ رۆژی رابردوودا هێزەكانی پێشمەرگە لەو میحوەرە بە توندی تیرۆریستانی داعشیان بۆردوومان كرد و نزیكەی 40 تیرۆریستیان لێ كوشتن و بە دەیانی دیكەیش بریندار بوون، ئێستا لە ناوچەكە داعش نابینرێن و بە شەوان خەریكی لێدانی خەندەقن، بۆ ئەوەی لەكاتی هێرشی هێزەكانی پێشمەرگە بەرگری لە خۆیان بكەن، بەڵام هەر كاتێك هێرشمان كردبێت، ئەوان شوێنەكانیان خۆیان جێ هێشتووە و بەرەو دواوە چوون، بۆیە ئێستا هیچ جموجۆڵێكیان لە ناوچەكە نەماوە، هەر كاتێكیش فەرمانمان پێ بكرێت، من لەو باوەڕەدام لەماوەی كەمتر لە 24 سەعاتدا هەموو ئەو ناوچانە لە تیرۆریستان پاك دەكەینەوە".