هەر ئێستا فەرماندەیەكی پێشمەرگە لە میحوەری خازر رایگەیاند، فڕۆكە جەنگییەكانی هاوپەیمانان بە سەختی مۆڵگە و بارەكانی داعش لە حەمدانییە و بەرتلە بوردوومان دەكەن و تا ئێستا بە گوێرەی زانیارییەكان 8 تیرۆرست كوژراون و ژمارەیەكیش بریندار بوون، هەروەها هەمەرێكی تیرۆریستانیش سووتێندراوە.

فەرماندەی هێزی پێشمەرگە لە چیای زەرتك موقەدەم (جادر سلێمان) بە ماڵپەڕی فەرمیی پارتیی دیموكراتی كوردستان رایگەیاند، دوای ئەوەی ئەمڕۆ لە هەر دوو میحوەرەی بەنداوی مووسڵ و چیای باشیك هێزەكانی پێشمەرگە گورزێكی كوشندەیان لە تیرۆرستانی داعش دا و ژمارەیەكی زۆریان لێ كوشتن و بریندار كردن، لە میحوەری خازریش سەرلەبەیانیی ئەمڕۆ داعش ناو بەناو تۆپی ئاڕاستەی پێشمەرگە دەكردن، هێزەكانی پێشمەرگەیش وەڵامیان دەدانەوە، بەڵام ئێستا فڕۆكە جەنگییەكانی هاوپەیمانان لە حەمدانییە و بەرتلە بە سەختی تیرۆریستانی داعش بۆردوومان دەكەن و تا ئێستا بە گوێرەی زانیارییەكان 8 داعش كوژراون و ژمارەیەكیش بریندار بوون.
موقەدەم (جادر) گوتیشی، لە میحوەری خازر، هێزەكانی پێشمەرگە بۆ هەر ڕووبەڕووبوونەوەیەك لە حاڵەتی ئامادەباشیدان و هەر كاتێ لە سەرووی خۆیان فەرمانیان پێ بگات، لە ماوەیەكی كەمدا ناوچەكە لە تیرۆریستان پاك دەكەنەوە.