ھێزی پێشمەرگە ئەمڕۆ لە سنووری بەنداوی مووسڵ، لە چەندین قۆڵەوە ھێرشی کردووەتە سەر داعش و، تاوەکو ئێستاش ڕووبەرێکی زۆری ناوچەکە لە داعش پاک کراوەتەوە و، زیانێکی زۆری گیانییش بە داعش گەیێندراوە.
(شیخ عەلی) فەرماندەی فەرماندەیی دھۆک، بە ماڵپەڕی فەرمیی پارتیی دیموکراتی کوردستانی راگەیاند: "شەر بەردەوامە و، لە قۆڵی ئیمە كه‌ لە ڕۆژھەڵاتداین و، تاوەکو ئێستا چوار گوند پاک کراونەتەوە و، 15تەرمی تیرۆریستانی داعشیش کەوتووەتە دەستمان؛ وا خەریکین بەرەو گردمامز و عوزێم دەچینە پێشەوە؛ لە قۆڵی بەنداوی مووسڵدا، گرده‌زێر تەواو بووە و، بەرەو مووسڵ پێشڕەوی دەکرێت و، زیانی داعش گەلێک زۆرە."
شیخ عەلی گوتیشی: "جگە لەو گوندانەی گیراونەتەوە، شارەدێی وانکێیش پاک کراوەتەوە؛ شەڕەکە گەرمە، چاوەڕێی سەرکەوتنی گەورە بن."
(ساڵح میرانی)، بەرپرسی ناوچەی پارتیی دیموکراتی کوردستان لە زوممار، بە ماڵپەڕی فەرمیی پارتیی دیموکراتی کوردستانی ڕاگەیاند: "پێشڕەویکردنی ھێزی پێشمەرگە بەردەوامە و، زیانێکی زۆریان لە داعش داوە؛ خۆکوژێک ھێرشی ھێنا بۆ ئەوەی خۆی بتەقێنێتەوە، بەڵام دەستگیر کرا و، بڕێکی زۆری چەک و تەقەمەنییش کەوتووەتە دەست ھێزی پێشمەرگە و، شەڕ هێشتایش گەرمە."
لەو لایشەوە، ئەفسەرێکی ھێزی پێشمەرگە بە ناوی ڕائید (ئەحمەد سورچی) گوتی: "ئێستا ئێمە گەیشتوونەتە سەر حەشارگەیەکی چەک و، تەقەمەنیی داعشان؛ چەکوجۆڵێکی زۆری تێدایە، بارەگای سەرەکیی داعش بووە لە ناوچەکەدا."