بەرپرسێكی سەربازیی كەنەدی ئاشكرایكرد، كە ژمارەیەك سەربازیان كە بۆ راهێنانی سوپای عێراق هاتوونەتە وڵاتەكە، بۆ یەكەمجار شەڕی زەمینی داعشیان كردووە، بەڵام شوێنی شەڕی كەنەدییەكانی لەگەڵ داعش ئاشكرانەكرد.

جەنەرال مایكڵ رۆلۆ، سەرۆكی ئۆپەراسیۆنە تایبەتەكان بە میدیاكانی وڵاتەكەی راگەیاندووە "سەربازانی كەنەدا لەكاتی هاوكارییان بۆ هێزە عێراقییەكان لە بەرەی پێشەوەی جەنگ لەلایەن داعشەوە بۆردومان كراون و ئەوانیش راستەوخۆ وەڵامیان داوەتەوە".

ژمارەیەكی زۆر سەرباز و راهێنەرانی وڵاتانی جیهان هاوكاری هێزەكانی پێشمەرگە و سوپای عێراق دەكەن لە شەڕی داعش، بەڵام ئەوە یەكەمجارە سەربازانی وڵاتێك شەڕی زەمینی داعش بكەن لە عێراق. ئەو بەرپرسە هەروەها رایگەیاند هیچ سەربازێكی كەنەدی لەو شەڕەدا نەكوژراوە و برینداریشیان نەبووە. گوتیشی "پێكدادانەكە لەماوەی ٧ رۆژی رابردوو روویداوە، هەركاتێك تەقە بەرەو روومان بكرێت راستەوخۆ وەڵام دەدەینەوە".

كەنەدا زیاتر لە ٦٠٠ سەربازی لەناوچەكە هەیە و بەشداریشە لە بۆردوومانی داعش بە فڕۆكەكانی.










رووداو