بەرەڤان حەمدی بەڕێوەبەری گشتی دیوان لە وەزارەتی كاروباری شەهیدان و ئەنفالكراوانی حكومەتی هەرێم رای دەگەیەنێت، لەچوار چیوەی هەوڵەكان بە ئاراستەی بە جینۆسایدناساندنی تاوانی لەدژی كوردانی ئێزدی وپێكهاتەكانی دیكە، لەرێی سەنتەرێكەوە پتر لە 200 بەڵگەنامە لەبارەی تاوانی دژ بە ئێزدیەكان بە شێوەیەكی زانستی كۆ كراوەتەوە.

هەروەها گوتی: هەوڵەكانی وەزارەتی كاروباری شەهیدان بۆ بە جینۆسایدناساندنی تاوانی دژ بە كوردانی ئێزدی و پێكهاتەكانی دیكە لەسەر دەستی داعش درێژەی هەیە، لەپارێزگەی دهۆك سەنتەرێكی لێكۆڵینەوەو كۆكردنەوەی بەڵگەو بە دیكۆمێنت كردنی دامەزراوە كە دادوەرێك سەرۆكایەتی دەكا تا ئێستە پتر لە 200 بەڵگەنامە كە بە شێوەیەكی زانستی كاری لەسەر كراوە كۆكراوە.

ئاماژەیبەوەشدا، ئەو بەڵگەنامەو دیكۆمێنت كە لەبواری بونی گۆڕی بە كۆمەڵ، گرتەی ڤیدیۆیی و گوتەی شایەتحال و چەندین بەڵگەی دیك كەوتۆتە دەست ئەو سەنتەرە كە دەریدەخەن داعش تاوانی گەورەی بەرامبەر بە ئێزدیەكان ئەنجامداوە.