كاروان جه‌مال،جێگری به‌رپرسی فه‌رمانگه‌ی په‌یوه‌ندییه‌كانی ده‌ره‌وه‌ی حكوومه‌تی هه‌رێم، رایگه‌یاند: به‌هۆی‌ ئه‌وه‌ی‌ داوای‌ پێدانی‌ په‌نابه‌ری‌ سیاسی‌ ده‌كه‌ن، هه‌ندێك وڵات پێدانی‌ ڤیزایان به‌ هاوڵاتیانی‌ هه‌رێم قورس كردووه‌.

كاروان جه‌مال،ئاماژه‌ی‌ به‌وه‌كرد: ئه‌و وڵاتانه‌ی له‌هه‌رێمی كوردستان كونسوڵخانه‌یان هه‌یه‌، پێدانی ڤیزایان ئاسان كردبوو، به‌ڵام به‌و دواییه‌ قورسیان كردووه‌.

وتیشی‌: هاوڵاتیان خۆیان هۆكاری قورسكردنی رێوشوێنه‌كانن، چونكه‌ هه‌ندێك له‌وانه‌ی له‌كوردستان ڤیزا وه‌رده‌گرن، ده‌رۆن له‌و وڵاتانه‌ داوای مافی په‌نابه‌ری ده‌كه‌ن، ئه‌وانیش ناچار بوونه‌ كه‌ رێوشوێنه‌كانی پێدانی ڤیزا قورس بكه‌ن.

باسی‌ له‌وه‌شكرد: كونسوڵخانه‌ی ئه‌ڵمانیا به‌فه‌رمی پێیان راگه‌یاندین به‌شێك له‌و كه‌سانه‌ی ڤیزایان له‌كونسوڵخانه‌كه‌یان وه‌رگرتووه‌، له‌ئه‌ڵمانیا داوای په‌نابه‌ری سیاسییان كردووه‌، بۆیه‌ وه‌زاره‌تی ده‌ره‌وه‌ی‌ وڵاته‌كه‌یان ئه‌و كونسوڵخانه‌یه‌یان ئاگادار كردووه‌ته‌وه‌ پرۆسه‌ی پێدانی ڤیزا توندتر بكه‌ن و داوای دڵنیایی زیاتر بكه‌ن.







باسنیوز